Նոր տեսախցիկների տեղադրումը նոր հարցեր է առաջացնում․ ՏԵՍԱՆՅՈՒԹ

ՀՀ նոր կառավարության վերաբերմունքը երթևեկությունը վերահսկող արագաչափ սարքերի և տեսախցիկների վերաբերյալ հայտնի է:

Նիկոլ Փաշինյանը մինչ վարչապետ եղած ժամանակ խստորեն քննադատել, անգամ՝ ակցիաներ է իրականացրել արագաչափերի դեմ:

Վարչապետի պաշտոնում Նիկոլ Փաշինյանը կառավարության՝ իրար հաջորդած երեք նիստերում անդրադարձավ վարորդին տուգանելու և արագաչափերի խնդրին՝ հստակ դեմ արտահայտվելով արագաչափերին և տեսախցիկներին:

Վարչապետի դիրքորոշումը հստակ է՝ արագաչափը, տեսախիցկը պետք է քաղաքացիների գրպանը մտնելու ձև չլինեն, քաղաքացին «տուգանքի մատերիալ» չէ: Սեպտեմբերի 7-ին տարածվեց տեղեկատվություն տեսախցիկների հնարավոր բազմացման վերաբերյալ: Խոսքը Երևանը ևս 2 հազար տեսախցիկով հսկելու մասին է:

Ոստիկանությունը մեկնաբանեց՝ վստահեցնելով, որ դա ընդդեմ վարորդների չէ և հիշեցնելով, որ ոստիկանությունը վարչապետի հանձնարարությամբ նախաձեռնել է տուգանքների նվազեցման, ինչպես նաև տուգանքը համագործակցությամբ փոխարինելու գործընթաց: Նրանք ուզում են պաշտպանել հասարակական կարգը: Ավտովարորդների պաշտպանության լիգայի ներկայացուցիչները նշում են, որ փաստացի՝ տուգանքների չափը մնացել է նույնը, իսկ այս վիճակում 2 հազար կամ մի քիչ ավել-պակաս թվով տեսախցիկներով համալրումը պատուհաս կդառնա: Բացի այդ, գործ ունենք մարդու իրավունքների ոտնահարման հետ հետ:

Մինչ կառավարությունը կհիմնավորի տեսախցիկների տեղադրման կարիքը, ուշագրավ է այն հարցը, թե դրանց տեղադրման հսկայական ներդրումը որ ընկերությունն է անելու:

Մինչ այս, հիշեցնենք, տեղադրում էր «Էլիպս» ընկերությունը, վերահսկում՝ «Սեքյուրիթի դրիմ»-ը: Սակայն հունիսի 21-ին այս ընկերություններում հատուկ գործողություններից հետո ոստիկանությունը հայտարարեց 1 միլիարդ 16 մլն դրամ հափշտակության մասին:

Ընկերությունների տնօրենները հանդես եկան հայտարարություններով, թե ոչ մի չարաշահում չկա, ոստիկանությունը շտապել է հայտարարություններ անելիս:

Այնուամենայնիվ, հասկանալի է, որ այդ ընկերությանն այլևս չեն դիմի նույն հարցով: Հնարավոր է՝ շուկա է մտնում նոր խաղացող:

Մանրամասները՝ տեսանյութում։