Մենք պետք է Երևանին վերաբերվենք որպես մեր տան․ Արտակ Զեյնալյան․ ՏԵՍԱՆՅՈՒԹ

«Լույս» դաշինքի քաղաքապետի թեկնածու Արտակ Զեյնալյանն այսօր հրավիրված հանրահավաքի ժամանակ անդրադարձավ Երևանի խնդիրներին և շեշտեց, որ տարիներ շարունակ մայրաքաղաքի համար բավարար միջոցներ չեն ծախսվել, ինչի հետևանքով ի հայտ են եկել բազմաթիվ խնդիրներ, ուստի «Լույս» դաշինքը գալիս է այդ խնդիրները լուծելու։ 

«Մենք պետք է Երևանին վերբերվենք որպես մեր տան։ Մենք մի մուտքում ունենում ենք հարևաններ, որոնց բարևում ենք կամ չենք բարևում, բայց այդ մուտքում մենք ապրում ենք, անգամ, եթե Հայաստանից բացակայում ենք, կարոտում ենք այն հարևանին, որին չենք սիրում, հետևաբար, կարող ենք ունենալ խնդիրներ միմյանց հետ, բայց դրանք թշնամանքի չպետք է վերածվեն։ Մենք միասին պետք է լուծենք մեր մուտքի խնդիրները»,- ասաց Արտակ Զեյնալյանը՝ շեշտելով, որ քաղաքացին խնդիրներ լուծելիս չպետք է տարանջատի իմն ու քոնը, ինչի շնորհիվ էլ Երևանի նկատմամբ վերաբերմունքը  կարող ենք փոխել։ 

«Երևանին պետք է տուրք տանք օրենքով սահմանված կարգով և այդ տուրքը պետք է ծախսվի մեր բարօրության համար։ Մենք պետք է վստահ լինենք, որ այդ միջոցները արդարաբար են ծախսվում։ Մենք պետք է անենք այնպես, որ այդ միջոցներն ավելանան և խնդիրները պակասեն, ոչ թե ստացվի այնպես միջոցները պակասեն և խնդիրներն ավելանան»,- ասաց Երևանի քաղաքապետի թեկնածուն։ 

«Լույս» դաշինքի քաղաքապետի թեկնածուն նաև բոլորին կոչ արեց կաշառք չվերցնել։

«Մենք կաշառք վերցնող երևանցի չենք»,-ասաց նա։

Արտակ Զեյնալյանը ելույթը եզրափակեց արդեն ավանդական դարձած հարցով․«Ես քեզ եմ  ընտրել Երևան, իսկ դո՞ւ»։

Մանրամասները՝ տեսանյութում։