Կա մտավախություն՝ Ադրբեջանը պատերազմ կսկսի COP 29-ից հետո․ կանխելու նպատակով քայլեր պիտի ձեռնարկենք․ Մարիա Կարապետյան. ՏԵՍԱՆՅՈՒԹ

Իշխանությունը փորձեց ՍԴ-ի որոշմամբ փարատել Ադրբեջանի մտահոգությունը ՀՀ-ի կողմից տարածքային պահանջներ ունենալու մասին։ Ըստ էության, ՍԴ-ն որոշեց, որ մայր օրենքի տեքստում որևէ երկրի դեմ ուղղված տարածքային պահանջ չկա։ Բայց Ադրբեջանը պնդում է, թե ՍԴ-ի այս որոշումից հետո ավելի են մեծացել տարածքային նկրտումները․ «Ընդգծվում է նախաբանի կարևորությունը որպես Սահմանադրության անբաժանելի մաս, որում հղում է կատարվում ՀՀ-ի Անկախության հռչակագրին, իսկ դրանում տարածքային նկրտումներ կան Ադրբեջանի նկատմամբ: Դատարանի որոշման մեջ նախաբանը և, հետևաբար, Անկախության հռչակագիրը բնութագրվել են որպես «հայկական պետականության հիմնարար սկզբունքներ» և նշվել է, որ դրանք անփոփոխ դրույթներ են, ինչն է՛լ ավելի է մեծացնում ադրբեջանական տարածքների նկատմամբ ՀՀ-ի նկրտումները»,- նշել է պաշտոնական Բաքուն։
Բացի այդ, Բաքուն հետևողականորեն մերժում է համաձայնեցված տեքստով խաղաղության համաձայնագիր ստորագրելու Երևանի առաջարկը, ավելին՝ օր օրի կոշտացնում է հռետորաբանությունը, ոչ միայն պնդում է Հայաստանի Սահմանադրությունը փոխելու իր գլխավոր պահանջը, այլ ավելացնում է նորերը, օրինակ՝ պատժել պատերազմի մասնակիցներին։ Այն, որ Ադրբեջանի հետ երկու-երեք տարի շարունակ խաղաղության պայմանագրի շուրջ բանակցող ՀՀ իշխանությունը խոսում է մոտալուտ պատերազմի, և ոչ՝ պայմանագիր կնքելու մասին, չի՞ փաստում իշխանության ձախողման մասին։ Այդ ինչպե՞ս և ինչի՞ շուրջ եք բանակցում, որ այսքան կորուստներից հետո դարձյալ պատերազմի վտանգ կա։

Պատասխանելով այս հարցադրումներին՝ ՀՀ ԱԺ «Քաղաքացիական պայմանագիր» խմբակցության պատգամավոր Մարիա Կարապետյանը Factor TV-ի հետ զրույցում ասում է, որ չնայած Ադրբեջանը կամք չի դրսևորում պայմանագիր կնքելու՝ ՀՀ իշխանությունը հավատարիմ է եղել խաղաղության օրակարգին․ «Ադրբեջանի հետ խաղաղության պայմանագրի տեքստը սադրանքների, ՀՀ տարածք ներժուխումների, ԼՂ-ի հայաթափմանը զուգահեռ հասցրել ենք մի հանգրվանի, որ տեսնում ենք՝ 13+3 կետերը պատրաստ են ստորագրման։ Եվ շատ ճիշտ արտաքին քաղաքականություն է այս մասին հանրահռչակել, այսինքն՝ մենք պատրաստ ենք տեքստը ստորագրել այսօր իսկ։ Ունենք մտավախություններ՝ Ադրբեջանի կողմից պատերազմի գնալու COP 29 գագաթնաժողովից հետո, և մեր գործընկերների հետ դա կանխելու նպատակով քայլեր պիտի ձեռնարկենք։ Պատերազմի վտանգը կանխվել է սահմանի սահմանազատված մասում, մեզ կարող եք քննադատել, որ մինչև վերջ չի կանխված, և որ մյուս մասերում ագերսիայի հնարավորությունը դեռևս պահպանվում է։ ՀՀ-ն պատերազմի հասունացման գործընթացին չպիտի մասնակցի, այլ պիտի հարձակման պատրվակները վերցնենք իր ձեռքից։ Աբսուրդային մեղադրա՛նք է հնչում, ՀՀ Սահմանադրությունը չունի խաղաղության պայմանագրի կնքմանը խոչընդոտող որևէ դրույթ․ ՍԴ-ն դա հաստատել է»,- ասում է իշխանական պատգամավորը։

Հարցազրույցն ամբողջությամբ՝ տեսանյութում։

Ռոբերտ Անանյան