Քոչարյանի, Սարգսյանի ուրվականները չէին խանգարի Բագրատ Գալստանյանի շարժմանը, եթե հստակ այլընտրանք ներկայացվեր. Բորիս Նավասարդյան․ ՏԵՍԱՆՅՈՒԹ

Բագրատ արքեպիսկոպոս Գալստանյանը վերսկսեց ընդդիմադիր շարժումը․ երեկ հանրահավաքից հետո ՍԴ-ի մոտ էին հավաք անցկացնում, իրենց ասելով՝ դեղին քարտ էին ցույց տալիս ՍԴ դատավորներին։ ՍԴ-ն օրերս որոշել էր, որ սահմանազատման կանոնակարգը չի հակասում ՀՀ Սահմանադրությանը, ինչպես նաև՝ ըստ էության որոշեցին, որ Անկախության հռչակագրի՝ Սահմանադրության մեջ չներառված դրույթները չունեն իրավական ուժ, ինչը վերաբերում է նաև ՀՀ և ԼՂ վերամիավորման որոշումներին։ Հաղթելու շանս ունի՞ այս շարժումը, որի առաջնորդները նախորդ ամիսներին Փաշինյանին հեռացնելու օրեր և ժամեր էին նշում որպես վերջնաժամկետ։
Քաղաքական վերլուծաբան Բորիս Նավասարդյանը Factor TV-ի հետ զրույցում ասում է, որ Քոչարյանի, Սարգսյանի «ուրվականները» չէին խանգարի Բագրատ Գալստանյանի շարժմանը, եթե հստակ այլընտրանք ներկայացվեր։

«Ի վերջո, ինչո՞ւ էին այդ ուրվականները անհաջողության մատնվում, երբ անկախ այս շարժման՝ գործունեություն էին ծավալում 44-օրյա պատերազմից հետո։ Հենց պատճառն այն էր, որ նրանք ոչինչ չէին առաջարկում։ Խնդիրը ոչ միայն այն է, որ նրանք նախկին են, այլ նաև նրանում է, որ իրենք ոչ մի բան չեն առաջարկում, որ համոզիչ կլինի ժողովրդի համար։ Ինչ հարցնում էիր, օրինակ՝ հիմա կչեղարկե՞ք նոյեմբերի 9-ի հայտարարությունը, ասում էին՝ ոչ, հարցնում էին՝ պատերազմ կսկսե՞ք Ադրբեջանի դեմ, ասում էին՝ ոչ, բա եթե այդ երկուսը չեք անում, ի՞նչ եք անելու․․․ բոլորս հասկանում ենք, ոչ մի բան չնշանակող հայտարարություն է ասելը, թե արժանապատիվ կբանակցեն։ Այնպես որ, շատ ավելի կոնկրետ գաղափարներ պետք է լսեն մարդիկ, որպեսզի առաջնորդվեն այս կամ այն քաղաքական առաջարկով»,- նշում է Նավասարդյանը։

Նա պնդում է, որ ամեն դեպքում, մարտավարական առումով՝ «ուրվականներից» ազատվելու խնդիրը կա․ «Դա ավելի անկաշկանդ է դարձնում քեզ։ Եվ մեր հասարակության այն մասը, որը ոչ մի կերպ չի ընդունում որևէ կապ անցյալի հետ, նրանց արհամարհել չի կարելի, եթե նոր ես մտնում քաղաքականության մեջ։ Այստեղ քո ցանկացած քայլը պետք է հստակ լինի։ Եթե հետևենք այդ շարժման առաջնորդին, ապա ինքը հանդիպում է հասարակության տարբեր ներկայացուցիչների հետ, և եթե հետևենք՝ լրագրողներից, փորձագետներից ո՞ւմ հետ է առավել կառուցողական և պատրաստակամ երկխոսում Բագրատ Գալստանյանը, ապա կտեսնենք, որ դրանից երևում է՝ որևէ կապ կա։ Եթե նույնիսկ որևէ պայմանավորվածություն չկա նրանց մեջ, ապա, ակնհայտորեն, Բագրատ Գալստանյանը ընտրում է նախկին երկու նախագահների թիմերին՝ որպես պոտենցիալ կամ իրական գործընկեր, ռեսուրս։ Թեև մենք լսել ենք, որ ես չգիտեմ՝ ով է դրել այս բեմը, ծախսը կատարել, դա, իհարկե, մարդկանց մոտ առաջացնում է հարցեր»։

Հարցազրույցն ամբողջությամբ՝ տեսանյութում։

Ռոբերտ Անանյան