13.06.2026 | 00:58
ԱԱ-2026․ Կանադան խուսափեց պարտությունից Բոսնիա և Հերցեգովինայի դեմ խաղում․ ՏԵՍԱՆՅՈՒԹ
ՀԱՊԿ-ում Ադրբեջանին դիտորդի կարգավիճակ տրամադրելու հարցը նույնպես կոնսենսուս է պահանջում. ԱԳՆ-ի պարզաբանումը
Քաղաքականություն
12.09.2018 | 12:34
Հավաքական անվտանգության պայմանագրի կազմակերպությանը (ՀԱՊԿ) Ադրբեջանի անդամակցության հնարավորության հարցը պարբերաբար քննարկվում է, ինչին ի պատասխան՝ Հայաստանից ամենաբարձր մակարդակով հայտարարվում է, որ պաշտոնական Երևանը կկիրառի վետոյի իր իրավունքը:
Վերջին շրջանում, սակայն, ակտիվացել են Ադրբեջանին ՀԱՊԿ-ում դիտորդի կարգավիճակ տրամադրելու շուրջ խոսակցությունները: Որոշ փորձագետներ նշում են, որ այս դեպքում արդեն ՀԱՊԿ անդամ պետությունների կողմից կոնսենսուսի անհրաժեշտություն չի առաջանա, ինչը հնարավորություն կտա Ադրբեջանին առանց Հայաստանի համաձայնության դառնալ ՀԱՊԿ դիտորդ երկիր։
Արդյո՞ք վետոյի իրավունքը գործում է ոչ միայն ՀԱՊԿ նոր անդամ ներգրավելու, այլեւ որևէ երկրի դիտորդի կարգավիճակ տալու դեպքում։ Այս հարցի պարզաբանման նպատակով Factor.am-ը հարցմամբ դիմեց ՀՀ ԱԳ նախարարություն:
ԱԳՆ լրատվության և հանրային դիվանագիտության վարչությունից ստացանք հետևյալ պարզաբանումը․ «Հայտնում ենք, որ ՀԱՊԿ Կանոնադրության 4-րդ գլխի 12-րդ հոդվածի առաջին պարբերությամբ և 7-րդ գլխի 21-րդ հոդվածով ՀԱՊԿ-ում դիտորդի կարգավիճակի տրամադրման որոշումը կայացնում է Հավաքական Անվտանգության Խորհուրդը, որում, բացառությամբ ընթացակարգային հարցերի, որոշումներն ընդունվում են կոնսենսուսով»:
Ասել է թե՝ Ադրբեջանը ՀԱՊԿ-ում չի կարող լինել ոչ լիարժեք անդամի, ոչ էլ դիտորդի կարգավիճակով՝ առանց Հայաստանի համաձայնության։
