22.06.2026 | 16:45
Բաքուն «Արևմտյան Ադրբեջանի ժառանգությունը․ վերադարձ պատմական արմատներին» միջոցառում է կազմակերպել
ՌԴ-ն պարտվում է, ծիծաղելի է ասել՝ Արևմուտքին ծնկի կիջեցնի․ ՀՀ-ն ԵՄ-ին անդամակցելու դիմում պիտի տա․ Արմեն Հովհաննիսյան․ ՏԵՍԱՆՅՈՒԹ
Քաղաքականություն
01.10.2024 | 19:00
Մի կողմից Ադրբեջանի նախագահ Իլհամ Ալիևը ՀՀ-ին և նրա իշխանությանը մեղադրում է զինվելու և ռևանշիստական նպատակներ ունենալու մեջ, մյուս կողմից ինքը՝ Ադրբեջանն է ակտիվորեն զինվում։ Ադրբեջանի ՊՆ-ն նաև պարբերաբար հաղորդագրություններ է տարածում, թե, իբր, ՀՀ Զինուժը խախտել է հրադադարի ռեժիմը՝ կրակել է ադրբեջանական դիրքերի ուղղությամբ։ Հայկական կողմը հերքում է այդ հաղորդագրությունները՝ հիշեցնելով, որ Ադրբեջանը չի արձագանքել հրադադարի ռեժիմի խախտումները հետաքննող երկկողմ մեխանիզմի ստեղծման՝ Երևանի առաջարկին։ Վերջին մեկ տարում Ադրբեջանը մեծաթիվ զորավարժություններ է անցկացրել․ վերջինը Նախիջևանում էր՝ հանկարծակի գրոհի սցենարով։ Ի՞նչ նպատակ է հետապնդում Ադրբեջանը։ Քաղաքական վերլուծաբան Արմեն Հովհաննիսյանը Factor TV-ի հետ զրույցում ասում է, թե զավեշտ է Ալիևի մեղադրանքը Փաշինյանին՝ ռևանշիստ լինելու մասով․
«ՀՀ-ին ագրեսոր ճանաչելու նպատակ ունի Ադրբեջանը, որպեսզի ստանա իրավունք՝ վերահսկել մեր դե-սուվերենիզացիան։ Այդ խոսույթը լինելու է միշտ։ Եթե նույնիսկ՝ Փաշինյանից պացիֆիստական կառավարություն լինի, Ալիևը ռևանշիզմի մեջ է մեղադրելու։ Այդ խոսույթը շարունակվելու է՝ եթե նույնիսկ Ադրբեջանը ստանա իրավունք, որ ինքը նշանակի ՀՀ ղեկավարին։ Դա քաղաքական մեխանիզմ է Ադրբեջանի համար, որը պետք է աշխատի։ Երկար տարիներ այդ խոսույթը չի դադարելու»,- ասաց Հովհաննիսյանը։
Այսինքն՝ Ադրբեջանը երկարաժամկետ հեռանկարում ՀՀ-ին ճնշման տակ պահելու ռազմավարությա՞մբ է առաջնորդվում։ Արմեն Հովհաննիսյանը «միանշանակ» պատասխանն է տալիս․ «Ալիևը դրան տվել է ոչ ինտիլիգենտ ձևակերպում, որ ՀՀ-ին երբեք թույլ չեն տա ծնկների վրայից բարձրանա։ Նա ոչ թե ասել է՝ ՀՀ-ն նորմալ երկիր լինի՝ ոչ ագրեսիվ, որը չի հարձակվի իրենց վրա, այլ ծնկների վրայից չի բարձրանա։ Այսինքն, Ալիևի տեսանկյունից ֆիքսվում է, թե ՀՀ-ն ծնկների վրա է և Հայաստանը այդ դիրքում պետք է մնա։ Ալիևն անում է այս ամենը, որ ՀՀ-ն զրկվի Արևմուտքի հետ կոմունիկացիոն կապերից, և որ այդ գիծը տարվի Արևմուտքի կողմից, ոչ թե Հայաստանի։ Դա մի խոսույթ է, որ ըստ Ալիևի՝ կստիպի Արևմուտքին ջանքերը թուլացնել, Արևմուտքը հարաբերությունների սառեցման կգնա»։
Այս իրավիճակում Արմեն Հովհաննիսյանն անթույլատրելի է համարում, որ ՀՀ-ն հրաժարվի Ադրբեջանի դեմ միջազգային դատական հայցերից, որ համաձայվի Մինսկի խմբի լուծարմանը։ Նա նաև մտահոգիչ որակեց ապաշրջափակման հարցում երրորդ կողմի ներգրավման հնարավոր հանգամանքը։
Հարցազրույցն ամբողջությամբ՝ տեսանյութում։
Ռոբերտ Անանյան
