07.10.2026 | 17:17
Ռուբիոն հայտարարել է, որ Իրանը «լիովին կորցրել է վերահսկողությունը» Հորմուզի նեղուցի նկատմամբ
Դուրովը քննիչներին հայտնել է իր տարեկան եկամտի չափը՝ 1 դիրհամ կամ 25 ռուբլի
Քաղաքականություն
26.09.2024 | 22:56
Telegram-ի համահիմնադիր Պավել Դուրովի հայտարարությունը տարեկան մեկ դիրհամ աշխատավարձի մասին տարակուսանք է առաջացրել ֆրանսիացի քննիչների մոտ, գրում է Le Monde պարբերականը։ Դիրհամը ԱՄԷ-ի արժույթն է, որտեղ վերջին տարիներին ապրել է Դուրովը։ Մեկ դիրհամը մոտավորապես հավասար է 25 ռուբլու, գրում է VOA-ն։
Դատական նիստում, որի ընթացքում քննարկվել է Դուրովի նկատմամբ խափանման միջոցի հարցը, Փարիզի դատախազությունը կողմ է արտահայտվել Telegram-ի հիմնադրի նկատմամբ գրավ սահմանելուն։ Ի սկզբանե առաջարկված 20 միլիոն եվրո գումարը դատավորը նվազեցրել է 5 միլիոնի։
Le Monde-ը հայտնում է, որ գրավի չափը շատ ցածր է։ Բոլորը գիտեն, որ 2023 թվականին Դուրովը Դուբայում բարեգործական աճուրդում պետհամարանիշի համար առաջարկել է 8,5 միլիոն եվրո։
Telegram-ի հիմնադրի կարողության չափը տարբեր աղբյուրների կողմից տարբեր կերպ է գնահատվում։ Սակայն փորձագետները հակված են կարծելու, որ Դուրովն ունի հարստություն, որի դրամական համարժեքը մոտավորապես 9-ից 15 միլիարդ դոլար է։
Չնայած այն հանգամանքին, որ Դուրովն իրեն գրեթե ոչինչ չի վճարում Telegram-ից, նա համարվում է մուլտիմիլիարդատեր։ Բացի 300 միլիոն եվրոյից, որը նա ստացել է 2014 թվականին ռուսական ВКонтакте սոցիալական ցանցում իր բաժնետոմսերի վաճառքից, Դուրովին է պատկանում Telegram-ի ամբողջ բաժնետիրական կապիտալը։ Մի քանի ներդրումային հիմնադրամների տվյալներով՝ խոսքը 30 մլրդ դոլարի մասին է։
Թարգմանությունը՝ Տաթև Ֆռանգյանի
