Նյու Յորքի քաղաքապետին մեղադրանք է առաջադրվել Թուրքիայի հետ կապված կոռուպցիայի գործով

Նյու Յորքի քաղաքապետ Էրիկ Ադամսին մեղադրանք է առաջադրվել։ Այս մասին հայտնում է The New York Times-ը՝ հղում անելով իր աղբյուրներին։ Քաղաքի պատմության մեջ առաջին անգամ գործող քաղաքապետը մեղադրվում է քրեական հանցագործությունների մեջ, գրում է Current time-ը։

Պաշտոնապես մեղադրանքները դեռևս չեն հրապարակվել, սակայն հայտնի է, որ դաշնային դատախազները տարվա ընթացքում հետաքննություն են իրականացրել Նյու Յորքի քաղաքապետի մի քանի մերձավոր խորհրդականների ու օգնականների նկատմամբ, այդ թվում՝ անվտանգության գծով փոխքաղաքապետի։ Նյու Յորքի ոստիկանության վարչության պետը և քաղաքի դպրոցների կառավարիչը վերջերս հրաժարական են տվել։

Դաշնային դատախազները հետաքննում են Ադամսի նախընտրական արշավի ֆինանսական աղբյուրները, երբ նա առաջադրվել է Նյու Յորքի քաղաքապետի պաշտոնում 2021 թվականին:

Ադամսի նկատմամբ դատախազների հետաքրքրության մասին հայտնի էր դարձել անցյալ տարվա աշնանը, երբ ՀԴԲ գործակալները հանրային միջոցառումից հետո կանգնեցրել էին նրան և առգրավել սմարթֆոնն ու պլանշետը։

Հավելենք, որ այս հետաքննությունը կենտրոնացած է Թուրքիայի կառավարության հետ Ադամսի փոխգործակցության վրա՝ կապված կոռուպցիոն գործարքների հետ՝ վերջինիս նախընտրական արշավի ֆինանսավորման գործով։

Սեպտեմբերի 25-ին հրապարակված տեսաուղերձում Ադամսն ասել է, որ իր դեմ ուղղված ցանկացած մեղադրանք «լիովին կեղծ է լինելու»: Նրա խոսքով՝ դարձել է դաշնային դատախազների թիրախը, քանի որ «կանգնել է նյույորքցիների կողքին»։ Ադամսը հասկացրել է, որ հրաժարական տալու մտադրություն չունի։

Հաղորդվում է, որ քաղաքապետին առաջադրված մեղադրանքները կարող են հրապարակվել սեպտեմբերի 26-ին։

Ի դեպ, Ադամսը սերտ կապեր ունի ոչ միայն Անկարայի, այլև Բաքվի հետ։ Ավելի վաղ բացահայտվել էր, որ Ադրբեջանի կառավարությունը ֆինանսավորել է Նյու Յորքի քաղաքապետի օգնականների այցը Բաքու։

Թարգմանությունը՝ Էմմա Չոբանյանի