Գլոբալ տաքացումը կրկնապատկել է Եվրոպայում ջրհեղեղների հավանականությունը

Եվրոպայում ջրհեղեղների հավանականությունը, որը նման է «Բորիս» փոթորկին հետևած հեղեղներին, կրկնապատկվել է մարդկանց կողմից կլիմայի փոփոխության պատճառով: Այս մասին ասվում է World Weather Attribution-ի՝ գիտնականների միջազգային խմբի հետազոտության մեջ, որը մասնագիտացած է բնական աղետներում կլիմայի փոփոխության դերի գնահատման մեջ:

Գիտնականները պարզել են, որ «Բորիս» փոթորկի հետևանքով չորս օրվա ընթացքում Եվրոպայում 20%-ով ավելի շատ անձրև է տեղացել, քան նախաարդյունաբերական աշխարհի նույն տարածաշրջանում կտեղային նմանատիպ պայմաններում: Գլոբալ տաքացման պատճառով տաք օդն ավելի շատ խոնավություն է պահում, ինչը հանգեցնում է ավելի ինտենսիվ անձրևների:

Միևնույն ժամանակ, World Weather Attribution-ն ընդգծել է, որ «Բորիսի» հետևանքները կարող էին ավելի լուրջ լինել, եթե չլինեին եվրոպական երկրների իշխանությունների կողմից ձեռնարկված կանխարգելիչ միջոցառումները. մայրցամաքում նախորդ ծանր ջրհեղեղներից հետո նրանք մեծ ներդրումներ կատարեցին կանխատեսման համակարգերում, ինչպես նաև ամբարտակների և այլ պաշտպանիչ կառույցների կառուցման գործում։

«Բորիս» փոթորիկը սեպտեմբերի 12-ից 15-ն անցել է Կենտրոնական և Արևելյան Եվրոպայով։ Դրա հետեւանքով Լեհաստանում, Չեխիայում, Ավստրիայում, Ռումինիայում, Իտալիայում և այլ երկրներում ճանապարհներ ու բնակավայրեր են լցվել, տասնյակ հազարավոր մարդիկ մնացել են առանց էլեկտրականության, որոշ շրջաններում հայտարարվել է արտակարգ դրություն։ Բնական աղետի զոհ է դարձել առնվազն 24 մարդ։

Թարգմանությունը՝ Տաթև Ֆռանգյանի