05.07.2026 | 12:54
Առանձնատանը կից շոգեբաղնիքում հրդեհ է բռնկվել․ դեպքի վայր է մեկնել 3 մարտական հաշվարկ
Ես կառչած չեմ այս պաշտոնից․ Վանեցյանը՝ հրաժարական տալու մասին. ՏԵՍԱՆՅՈՒԹ
Տեսանյութեր
11.09.2018 | 16:11
Ես կառչած չեմ այս պաշտոնից, ես ԱԱԾ տնօրենի պաշտոնը զբաղեցնում եմ շատ մեծ պատասխանատվությամբ և կարծում եմ, որ շատ գործեր ունեմ անելու: Այս մասին այսօր՝ սեպտեմբերի 11-ին հրավիրած մամուլի ասուլիսում հայտարարեց ՀՀ Ազգային անվտանգության ծառայության (ԱԱԾ) տնօրեն Արթուր Վանեցյանը՝ պատասխանելով իր և ՀՀ Հատուկ քննչական ծառայության (ՀՔԾ) պետ Սասուն Խաչատրյանի զրույցի սկանդալային ձայնագրության հրապարակումից հետո հնարավոր հրաժարականի մասին հարցին:
«Ես ԱԱԾ տնօրենի պաշտոնը զբաղեցնում եմ շատ մեծ պատասխանատվությամբ և կարծում եմ, որ շատ գործեր ունեմ անելու: Եվ որ վայրկյանին հասարակությունը կներկայացնի նման պահանջ, որ ես պետք է հրաժարական տամ, ես այդ հրաժարականը կտամ… կա՛մ հասարակությունը, կա՛մ քաղաքական ղեկավարությունը»,- հավելեց Վանեցյանը:
Նրա պնդմամբ՝ ձայնագրությունը տարածելու հիմնական նպատակն իրենց թուլացնելն է. «Այդ ձայնագրությունը տարածելու հիմնական նպատակն այն է, որպեսզի թուլացնեն մեզ՝ նկատի ունեմ ԱԱԾ-ն, ՀՔԾ-ն, որ այն գործը, որը սկսել ենք, կիսատ թողնենք: Մենք ենք այս գործը սկսել, մենք ենք տեղյակ մանրամասներին, և մենք ունենք այնքան կամք և վճռականություն, որ այդ գործը հասցնենք իր ավարտին»:
Արթուր Վանեցյանի համար հանելուկ է, թե ով է գաղտնալսել իր և Սասուն Խաչատրյանի խոսակցությունը: «Ինձ համար հանելուկ է: Գիտեք, որ ձայնագրությունը մի քանի ժամ առաջ է հրապարակվել: Եթե ԱԱԾ-ի ներսում է արվել, շատ ցավալի է»,- ասաց ԱԱԾ տնօրենը:
