Քաղաքականություն
17.09.2024 | 15:30Վճռաբեկ հակակոռուպցիոն դատարանը բեկանել է Հայաստանի երկրորդ նախագահ Ռոբերտ Քոչարյանի, ՀԱՊԿ նախկին գլխավոր քարտուղար Յուրի Խաչատուրովի, պաշտպանության նախկին նախարար Սեյրան Օհանյանի և նախկին փոխվարչապետ Արմեն Գևորգյանի գործը կարճելու վերաբերյալ դատավոր Աննա Դանիբեկյանի 2021 թվականի որոշումը։ Գործն ուղարկվել է Հակակոռուպցիոն դատարան՝ նոր քննության։ Այսօր էլ Գլխավոր դատախազությունը հանդես է եկել հայտարարությամբ, որում նշում է․ «Ի թիվս այլնի՝ Վճռաբեկ դատարանն արձանագրել է, որ առկա պայմաններում Առաջին ատյանի դատարանի՝ Ռոբերտ Քոչարյանի, Սեյրան Օհանյանի, Արմեն Գևորգյանի և Յուրի Խաչատուրովի նկատմամբ հարուցված քրեական հետապնդումը դադարեցնելու մասին որոշումն իրավաչափ չէ, և որ Սահմանադրական դատարանի կողմից Քրեական օրենսգրքի 300.1 հոդվածը Սահմանադրությանը հակասող և անվավեր ճանաչվելուց հետո, մինչև դատարանի կողմից խորհրդակցական սենյակ հեռանալը, մեղադրողն իրավասու է եղել փոփոխելու նշված անձանց մեղսագրված արարքի իրավաբանական գնահատականը: Ի պատասխան լրատվամիջոցներից ստացված հարցումների՝ տեղեկացնում ենք, որ նկատի ունենալով, որ Ռոբերտ Քոչարյանին և մյուսներին վերագրվող արարքներում առկա են Քրեական օրենսգրքի այլ հոդվածով նախատեսված հանցագործության հատկանիշներ, վերոնշյալ քրեական գործով մեղադրողն առաջիկայում Հակակոռուպցիոն դատարան կներկայացնի համապատասխան որոշում»։
Իրավապաշտպան Նինա Կարապետյանցին Factor TV-ի տաղավարում հարց ուղղեցինք՝ արդյո՞ք սա նշանակում է, որ Քոչարյանին նոր մեղադրանք է առաջադրվելու։
«Հավանաբար՝ այո, զուտ տպավորություն ստեղծելու համար, որ մենք ունենք ինչ-որ պրոցեսներ, որ Ռոբերտ Քոչարյանն այդպես անպատիժ չհեռացավ։ Բայց փաստն այն է, որ Մարտի 1-ի գործը Սերժ Սարգսյանի թագավորության օրոք չէր փակվել, այն դեռ շարունակվում էր գոյություն ունենալ։ Նիկոլ Փաշինյանի իշխանության կամ թագավորության օրոք այն ոչ միայն փակվեց, այլև Ռոբերտ Քոչարյանին նվիրվեց արդարացման վճիռ»,- ասաց նա։
Իրավապաշտպանը չունի ակնկալիք, որ Մարտի 1-ի գործով նոր մեղադրանքներ առաջադրելուց հետո փոփոխություններ կլինեն՝ պատժաչափերի տեսքով, սակայն նա կարևոր է համարում, որ գործում առկա նյութերը դատարանում հրապարակվեն, և հանրությունը տեղեկանա քննության ի հայտ բերած փաստերի մասին։
Հարցազրույցն ամբողջությամբ՝ տեսանյութում։
Ռոբերտ Անանյան
