Թբիլիսին մերժել է Բաքվի կողմից հետապնդվող ադրբեջանցի լրագրողին ապաստան տրամադրել

Վրաստանի միգրացիոն ծառայությունը հրաժարվել է ապաստան տրամադրել Ադրբեջանի քաղաքացի, Azel․TV կայքի հիմնադիր Աֆղան Սադիգովին։ Այս մասին ադրբեջանական լրատվամիջոցներին հայտնել է նրա կինը՝ Սևինջ Սադիգովան։

«Աֆղանը զանգահարեց ինձ քննչական մեկուսարանից ու ասաց, որ իրեն փոխանցել են Միգրացիոն ծառայության պատասխանը։ Դրանում ասվում է, որ իրեն մերժել են քաղաքական ապաստան տրամադրել»,- ասել է կինը։

Վրացական կողմն իր մերժումը բացատրել է նրա դեմ հարուցված գործում «քաղաքական դրդապատճառների բացակայությամբ»։

Այժմ Սադիգովին սպառնում է արտաքսում Ադրբեջան։ Համապատասխան հարցումն Ադրբեջանի գլխավոր դատախազությունից ստացվել է հուլիսին։ Դրանում ասվում է, որ մայիսի 10-ին Սադիգովի դեմ քրեական գործ է հարուցվել շորթման մեղադրանքով։ Դատարանի որոշմամբ՝ նրա նկատմամբ հայտարարվել է հետախուզում։

Հիշեցնենք, որ Թբիլիսիի դատարանն օգոստոսի 4-ին որոշում էր կայացրել Azel.TV կայքի լրագրող Աֆղան Սադիգովին 2 ամսով կալանավորելու մասին։ Դեռևս օգոստոսի 3-ին նրա կինը ֆեյսբուքյան ուղիղ եթերում հայտնել էր Սադիգովի ձերբակալության մասին։ Նա ասել էր, որ դա տեղի է ունեցել իր ու երեխաների աչքի առաջ, երբ միասին դուրս են եկել տնից։ Կինը կարծում է, որ վրացական ոստիկանությունն իր ամուսնուն ձերբակալել է Ադրբեջանի նախագահ Իլհամ Ալիևի  հրահանգով։

«Նրան ձերբակալողները ոստիկանական համազգեստով չէին, հետո հագան: Աֆղանին ձեռնաշղթաներով, հանցագործի պես տարան, նստեցրին սև մեքենա»,- պատմել էր կինը։

Հուլիսի 18-ին էլ Սադիգովին Թբիլիսիի օդանավակայանում թույլ չէին տվել Անկարա թռչել։ Նրան ձերբակալել էին սահմանային անցակետում։ Սադիգովի խոսքով՝ իրեն ասել են, որ բացի Ադրբեջանից՝ այլ երկիր գնալ չի կարող։

Լրագրողը Վրաստանում է ապրում անցյալ տարվա դեկտեմբերի 24-ից։ Սադիգովը բուժման նպատակով գնացել է Վրաստան, սակայն սպառնալիքների պատճառով չի վերադարձել Ադրբեջան։ Նա նախկինում կալանավորվել է 2020 թվականի մայիսին՝ շորթման մեղադրանքով։ 2020-ի նոյեմբերի 3-ին դատարանը նրան դատապարտել է 7 տարվա ազատազրկման։ Վերաքննիչ դատարանը պատիժը կրճատել է մինչև 6 տարի, իսկ Գերագույն դատարանը՝ 4 տարի։ 2022 թվականի մայիսին նրան ներում է շնորհվել։ Տեղական իրավապաշտպանները Սադիգովին ճանաչել են որպես քաղբանտարկյալ։

Էմմա Չոբանյան