26.06.2026 | 23:30
Հունիսի 29-ին Հայաստանի մի շարք հասցեներում էլեկտրաէներգիայի անջատումներ կլինեն
Հարկերը ուշացնելու համար տույժերը 2025-ի հունվարից կբարձրանան․ ՏԵՍԱՆՅՈՒԹ
Տնտեսություն
11.09.2024 | 15:07
Ազգային ժողովն այսօր ընդունեց Կառավարության հեղինակած նախագիծը, որով հարկի վճարումը սահմանված ժամկետներից ուշացնելու տույժի դրույքաչափը կվերանայվի:
Դեռևս 2020 թվականի ապրիլից կորոնավիրուսի տնտեսական հետեւանքները վերացնելու նպատակով գործադիրն օրենքով վերանայել է տույժի դրույքաչափը` օրական 0.075 տոկոսից փոխելով 0.04 տոկոսի:
ՀՀ պետական եկամուտների կոմիտեի նախագահի տեղակալ Արթուր Մանուկյանի խոսքով հաշվի առնելով այն փաստը, որ վերացել են 2020 թվականին առկա հանգամանքները, ինչպես նաև այն, որ տույժի չափը համադրելի չէ, օրինակ, կազմակերպությունների կողմից բիզնես վարկերի համար վճարվող տոկոսաչափերին` Կառավարությունն առաջարկում է 2025 թվականի հունվարի 1-ից օրական տույժը կրկին սահմանել 0.075 տոկոսի չափով:
Զեկուցողի խոսքով նախաձեռնությամբ առաջարկվում է, որ հարկային վարչարարությանն աջակցելու համար հանրային հսկողության մեխանիզմներ ներդնելու նպատակով Կառավարությունը կարող է սահմանել հարկային վարչարարության աջակցման ծրագրեր, դրանց իրականացման կարգը և ժամկետները: Հարակից զեկուցող, Տնտեսական հարցերի մշտական հանձնաժողովի անդամ Հովիկ Աղազարյանը ներկայացրել է նախագծի վերաբերյալ հանձնաժողովի դրական եզրակացությունը: Պատգամավորը, ողջունելով նախաձեռնությունը, կոչ է արել կողմ քվեարկել:
«Հայաստան» խմբակցության պատգամավորները, սակայն, մտահոգություններ ունեին նախագծի վերաբերյալ։
«Այս կառավարության համար տուգանքն ու տույժը որպես եկամուտի աղբյուր են դիտվում։ Տույժերը և տուգանքները նախորդ տարվա համեմատ աճել են 20%-ից ավելի, դա նշանակում է, որ խայտառակ է հարկայինի վիճակը»,- այս մասին ԱԺ ամբիոնից հայտարարեց «Հայաստան» խմբակցության պատգամավոր Արթուր Խաչատրյանը։
«ՀՀ հարկային օրենսգրքում լրացում և փոփոխություններ կատարելու մասին» օրենքի նախագիծն առաջին ընթերցմամբ քննարկել և ընդունել է սեպտեմբերի 11-ի ԱԺ նիստում:
