09.09.2026 | 13:07
Օդի ջերմաստիճանը Հայաստանում կբարձրանա 6-8 աստիճանով
ՍԴ-ն սեպտեմբերի 24-ին կքննի սահմանազատման հանձնաժողովների համատեղ աշխատանքի մասին կանոնակարգը
Քաղաքականություն
10.09.2024 | 16:22
Հայ-ադրբեջանական սահմանազատման հանձնաժողովների կանոնակարգի վերաբերյալ դիմումը մուտքագրվել է Սահմանադրական դատարան, այս մասին Factor.am-ին հայտնեցին Սահմանադրական դատարանի հանրային կապերի բաժնից։ ՍԴ-ից նաև տեղեկացրին, որ Հայաստան-Ադրբեջան սահմանազատման հանձնաժողովների համատեղ աշխատանքի մասին կանոնակարգի հարցի քննությունը նշանակված է սեպտեմբերի 24-ին։
Վարչապետ Նիկոլ Փաշինյանը «Երևանյան երկխոսություն» միջազգային համաժողովի ժամանակ այսօր հայտարարել էր, որ Հայաստանի և Ադրբեջանի սահմանազատման հանձնաժողովների գործունեության կանոնակարգը Հայաստանի կառավարությունն ուղարկել է Սահմանադրական դատարան՝ դրա սահմանադրականությունը ստուգելու համար։ Սահմանադրական դատարանի դրական որոշման դեպքում փաստաթուղթը Կառավարությունը կուղարկի Ազգային ժողով վավերացման:
Հիշեցնենք, որ սահմանազատման հանձնաժողովների Կանոնակարգը սահմանված ժամկետից շուրջ երկու ամիս ուշ ստորագրվեց։ Ըստ այս փաստաթղթի՝ Երևանն ու Բաքուն համաձայնել են սահմանազատումն իրականացնել 1991 թվականի Ալմա-Աթայի հռչակագրի վրա, բայց այդ համաձայնությունը վերջնական չէ։
Կանոնակարգում նաև նշվում է՝ գործընթացը հնարավոր է հետագայում՝ խաղաղության համաձայնագրի ընդունումից հետո, այլ սկզբունքներով ընթանա։
«Եթե հետագայում Հայաստանի Հանրապետության և Ադրբեջանի Հանրապետության միջև խաղաղության և միջպետական հարաբերութուննների հաստատման մասին համաձայնագրով նախատեսվեն այլ կարգավորումներ, ապա տվյալ հիմնարար սկզբունքը կհամապատասխանեցվի վերը նշված համաձայնագրով սահմանված սկզբունքներին», – ասված է կանոնակարգի տեքստում։
Մանյա Պողոսյան
