Պատերազմից հետո 17 000 ինքնաձիգ է կորել․ զենքով հանցագործությունների 70% աճ կա․Դանիել Իոաննիսյան․ ՏԵՍԱՆՅՈՒԹ

Նալբանդյան գյուղում անձի կողմից ոստիկանների ուղղությամբ կրակոցներ արձակելու դեպքը հարցեր է առաջացրել ՆԳՆ գործունեության վերաբերյալ։ Ոստիկաններից մեկը սպանվել է, մյուսը ստացել է վնասվածքներ։ Factor TV-ի հետ հարցազրույցում «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանից հետաքրքրվեցինք՝ ինչո՞ւ է պնդում, որ նաև ՆԳՆ ղեկավարության վրա է ոստիկանի զոհվելու պատասխանատվությունը։

Իոաննիսյանը, որն ընդգրկված էր ոստիկանության բարեփոխումների հանձնաժողովում, ասաց․ «Մեռանք բարձրացնելով ոստիկանների կրակային ու տակտիկական պատրաստության, ՆԳՆ մարզային հրաձգարանների բացակայության հարցը»։ Ի պատասխան՝ նա նշեց, որ ահազանգի հետքերով պետք է դեպքի վայր ուղարկվեին պարեկներ, ոչ թե օպերլիազորներ։

«Ոստիկանները մահվան բերան են ուղարկվել, և ես պնդում եմ, որ նաև ՆԳՆ ղեկավարության վրա է զոհվելու պատասխանատվությունը։ Հայաստանի ոստիկանները զենքից օգտվել չգիտեն։ Մի դեպքում էլ ոստիկանի վրա է կրակել բերման ենթարկված անձը՝ իրենց ավտոմատից։ Խայտառակություն է, ըստ վիճակագրության՝ մարդասպանների ¾-ը դատարանների առաջ չեն կանգնում, 4 դեպքից 1-ն է դատարան հասնում, զենքով արված հանցագործությունները 70%-ով աճել են։ Պատերազմից հետո 17 000 ինքնաձիգ է կորել, ինտենսիվ սկսել են կրակել 2024 թվականին, հանցագործները չեն պատժվում։ Ֆուչիկի փողոցում մարտական նռնակով, ինքնաձիգերով ռազբորկա են արել կրիմինալ խմբերը, բայց նրանք ազատության մեջ են»,- ասաց Դանիել Իոաննիսյանը՝ պնդելով, որ ՆԳՆ նախարար Վահե Ղազարյանի օրոք հանցավորության դեմ պայքարն բավարար չէ։

Հարցազրույցն ամբողջությամբ՝ տեսանյութում։

Ռոբերտ Անանյան