Դուրովը ձերբակալությունից հետո առաջին հայտարարությունն է տարածել, պատմել հարցաքննության մասին

Telegram-ի հիմնադիր Պավել Դուրովը Ֆրանսիայում ձերբակալությունից հետո իր առաջին հայտարարությունն է արել։ Նրան մեղադրանք է առաջադրված մի քանի հոդվածով, այդ թվում՝ լիազոր մարմինների պահանջով տեղեկատվություն կամ փաստաթղթեր տրամադրելուց հրաժարվելու համար: Դուրովի խոսքով՝ ինքը չորս օր հարցաքննվել է։ «Ինձ ասացին, որ ես կարող եմ անձամբ պատասխանատվություն կրել ուրիշների կողմից Telegram-ի անօրինական օգտագործման համար, քանի որ Ֆրանսիայի իշխանությունները պատասխաններ չեն ստացել»,- գրել է նա։
Դուրովը կարծում է, որ իր կալանավորումը «զարմանալի է մի քանի պատճառներով»։  Ըստ նրա՝ Telegram-ն ունի իր պաշտոնական ներկայացուցիչը ԵՄ-ում, որը պատասխանում է ԵՄ-ի հարցումներին, և Ֆրանսիայի իշխանությունները «բազմաթիվ ճանապարհներ են ունեցել կապ հաստատելու» նրա հետ։
«Եթե երկիրը դժգոհ է ինտերնետ ծառայությունից, ապա, ըստ հաստատված պրակտիկայի, նա դատական վարույթ է հարուցում հենց ծառայության դեմ։ Օգտագործելով մինչսմարթֆոնային դարաշրջանի օրենքները՝ գործադիր տնօրենին երրորդ անձանց կողմից իր կողմից վերահսկվող հարթակում կատարված հանցագործությունների մեջ մեղադրելը սխալ մոտեցում է: Տեխնոլոգիաներ ստեղծելն առանց այն էլ դժվար է»,- գրել է նա։
Դուրովն ասել է, որ գաղտնիության և անվտանգության միջև ճիշտ հավասարակշռություն հաստատելը հեշտ չէ, բայց իրենք «միշտ բաց են եղել երկխոսության համար»:
«Նման դեպքերում մենք պատրաստ ենք լքել այդ երկիրը։ Մենք այդպես շատ անգամներ ենք արել։ Երբ Ռուսաստանը մեզանից պահանջեց հանձնել «գաղտնագրման բանալիները»՝ հսկողությունը հնարավոր դարձնելու համար, մենք մերժեցինք, և Telegram-ն արգելվեց Ռուսաստանում: Երբ Իրանը պահանջեց արգելափակել խաղաղ ցուցարարների ալիքները, մենք մերժեցինք, և Իրանում արգելվեց Telegram-ը։ Մենք պատրաստ ենք հեռանալ շուկաներից, որոնք չեն համապատասխանում մեր սկզբունքներին, քանի որ մենք դա չենք անում փողի համար։ Մենք առաջնորդվում ենք բարիք գործելու և մարդկանց հիմնարար իրավունքները պաշտպանելու մտադրությամբ, հատկապես, երբ այդ իրավունքները ոտնահարվում են»: