01.06.2026 | 22:54
Ինչպես հայտագրել առաջին դասարանցիներին
ՌԴ-ն Հյուսիսային Կորեային 1 մլն բարել նավթ է մատակարարել զենքի ու զինծառայողների դիմաց
Քաղաքականություն
22.11.2024 | 11:35
Այս տարվա մարտից Ռուսաստանը Հյուսիսային Կորեային ավելի քան 1 մլն բարել (56 հազար տոննա) նավթ է մատակարարել։ Այս եզրակացությանն է եկել բրիտանական հետազոտական Open Source Center կենտրոնն արբանյակային պատկերների վերլուծությունից հետո, գրում է BBC-ի ռուսական ծառայությունը։
Մեծ Բրիտանիայի ԱԳ նախարար Դեյվիդ Լեմմին BBC-ին հայտնել է, որ իրենց համոզմամբ՝ այս նավթով Մոսկվան վճարում է Փհենյանին զենքի և զինծառայողների դիմաց, որոնց Հյուսիսային Կորեան ուղարկում է Ռուսաստան՝ Ուկրաինայի դեմ պատերազմելու։
Արբանյակային պատկերների վերլուծությունը ցույց է տալիս, որ վերջին ութ ամսվա ընթացքում ավելի քան մեկ տասնյակ հյուսիսկորեական լցանավեր 43 ուղևորություն են կատարել Հեռավոր Արևելքի ռուսական նավթային տերմինալ: Լցանավերի նկարներից երևում է, որ դրանք դատարկ են գնացել Ռուսաստան և բեռնված վերադարձել։
Առաջին նման չվերթը, որը փաստագրվել է կենտրոնի կողմից, տեղի է ունեցել 2024 թվականի մարտի 7-ին՝ Ռուսաստան հյուսիսկորեական զինամթերքի մատակարարման առաջին հաղորդումներից յոթ ամիս անց: Վերջինը եղել է նոյեմբերի 5-ին։
«Նավթի այս մշտական հոսքը Հյուսիսային Կորեային տալիս է կայունության այնպիսի մակարդակ, որը չի տեսել պատժամիջոցների սահմանումից հետո»,-ասել է Open Source Center-ի ավագ վերլուծաբան Ջո Բերնը։
Հյուսիսային Կորեան իր միջուկային ծրագրի պատճառով գտնվում է ՄԱԿ-ի պատժամիջոցների տակ և նրան արգելված է տարեկան 500 հազարից ավելի բարել նավթ գնել։ 1 մլն բարելը, որի մասին խոսում է Open Source Center-ը, Ռուսաստանի համար շատ փոքր ծավալ է։ Ըստ պաշտոնական տվյալների՝ մեկ օրում այստեղ արտադրվում է գրեթե տասն անգամ ավելի։ ՌԴ ԱԳՆ-ն չի պատասխանել լրատվամիջոցի խնդրանքին՝ մեկնաբանելու է Open Source Center-ի ուսումնասիրությունը։
Թարգմանությունը՝ Էմմա Չոբանյանի
