Իրանը առճակատվում է ՌԴ-ի հետ՝ «Զանգեզուրի միջանցք»-ն անընդունելի համարելով․ սա աննախադեպ հակասություն է այդ երկրների միջև․ Սոսի Թաթիկյան․ՏԵՍԱՆՅՈՒԹ

ՀՀ-ում ՌԴ դեսպանը մի շարք մեղադրանքներ է ուղղել ՀՀ-ին և ԵՄ-ին։ Նախ՝ Սերգեյ Կոպիրկինը կրկնել է Ադրբեջանից հաճախ հնչող այն թեզը, թե «ԵՄ առաքելությունը, որն աշխատում է հայ-ադրբեջանական սահմանին, մոնիթորինգի անվան տակ հետախուզական տվյալներ է հավաքում Ռուսաստանին, Ադրբեջանին և Իրանին հակազդելու համար»։ Ադրբեջանից էլ օրերս ասում էին, թե ԵՄ դիտորդները պետք է դուրս գան՝ սահմանազատման կանոնակարգի ստորագրումից հետո։ Օրերս էլ Լավրովն էր պաշտոնական Երևանին հիշեցրել նոյեմբերի 9-ի 9-րդ կետը՝ մեկնաբանելով այն իբրև ՌԴ ԱԴԾ-ին վերահսկողական մեխանիզմներ վերապահող պարտավորություն։

Իրանում ՌԴ դեսպան Ալեքսեյ Դեդովն Իրանի ԱԳՆ է կանչվել. պատճառը վերջին շրջանում Մոսկվայի կողմից ցուցաբերվող աջակցությունն է «միջանցքի» գաղափարին, որը պետք է Ադրբեջանը Հայաստանի տարածքով կապի Նախիջևանի հետ, հայտնում է Իսլամական հեղափոխության պահապանների կորպուսի տելեգրամյան ալիքը: Իրանն իր մտահոգությունն է հայտնել՝ նշելով, որ դեմ է աշխարհաքաղաքական ցանկացած փոփոխության, որը կարող է խախտել տարածաշրջանում հաստատված սահմանները: Իրանի ԱԳՆ Եվրասիայի վարչության պետ Մոսթաֆա Դեմիրչիլուն ընդգծել է տարածաշրջանի բոլոր երկրների շահերին և օրինական մտահոգություններին ուշադրություն դարձնելու անհրաժեշտությունը:

Միջազգային հարաբերությունների և անվտանգության հարցերի մասնագետ Սոսի Թաթիկյանը, մեկնաբանելով իրավիճակը, Factor TV-ի հետ հարցազրույցում ասում է․ «Իրանը խիստ տոնով ՌԴ-ի դեսպանին ասաց, որ «Զանգեզուրի միջանցք»-ն անընդունելի է, ինչը մեծ հակասություն է Մոսկվայի և Թեհրանի միջև։ Իրանը առճակատվում է ՌԴ-ի հետ՝ «Զանգեզուրի միջանցք»-ն անընդունելի համարելով»։

Կոպիրկինը մեղադրեց ԵՄ դիտորդներին ՀՀ-ին ուղղված այն մեղադրանքի համատեքստում, թե «այսօր Հայաստանի առջև ծառացած շատ ռիսկեր կարող էին կրճատվել, եթե 2022 թվականի սեպտեմբերին Երևանը համաձայներ ՀԱՊԿ-ի միջնորդությամբ Ադրբեջանի հետ սահմանին իրավիճակը կայունացնելու միջոցառումների փաթեթ իրականացնելու առաջարկին»։ Կոպիրկինը նշել է, որ խոսքը «լուրջ նախաձեռնություններ»-ի մասին էր, այդ թվում՝ ռազմատեխնիկական աջակցության, դիտորդական առաքելություն ուղարկելու, սահմանապահ զորքերի պատրաստման հարցում աջակցության։ Սոսի Թաթիկյանը նշում է, որ ՌԴ-ն և Ադրբեջանը հիբրիդային պատերազմ են վարում ԵՄ առաքելության դեմ, որը զսպում է Ադրբեջանի ագրեսիան ՀՀ-ի դեմ․ «Ադրբեջանի ռազմական հարձակումը կշարունակվեր՝ տարածքներ կկորցնեինք, միջանցք կբացեին, ՌԴ-ից փրկություն կխնդրեինք, եթե ԵՄ առաքելությունը չլիներ»։ Փորձագետը նշում է, որ ագրեսիան շարունակելու նպատակ ունեն ԵՄ դիտորդներին հեռացնելու Ադրբեջանի պնդումները։

Հարցազրույցն ամբողջությամբ՝ տեսանյութում։

Ռոբերտ Անանյան