Աբրահամ Գասպարյանն ու Մենուա Սողոմոնյանն այլևս ԵՊՀ դասախոս չեն․ բուհից պնդում են՝ քաղաքական ենթատեքստ չկա

Քաղաքագետ Աբրահամ Գասպարյանն այսօր ֆեյսբուքյան գրառմամբ հայտնել է ԵՊՀ միջազգային հարաբերությունների ֆակուլտետից աշխատանքի հեռացման մասին։ Ըստ Գասպարյանի՝ պատճառը քաղաքական է։

«Անձամբ հետամուտ եմ լինելու այս որոշման դեմ պայքարելու և իմ դասախոսական կարգավիճակը վերականգնելու գործում»,- գրել է Աբրահամյանը:

Երեկ էլ նույն ֆակուլտետի դասախոս Մենուա Սողոմոնյանն էր ֆեյսբուքյան գրառմամբ տեղեկացրել, որ ԵՊՀ ղեկավարությունը հրաժարվել է իր հետ կնքել աշխատանքային նոր պայմանագիր և ազատել է աշխատանքից։

«Միջազգային հարաբերությունների ֆակուլտետն էլ որոշել է, որ ես չպետք է ունենամ ուսումնական բեռնվածություն․ իմ բոլոր դասընթացները «երջանիկ պատահականությամբ» հանվել են կա՛մ ուսումնական պլաններից, կա՛մ քաղաքագիտության ամբիոնի բալանսից։ Այդ ամենը տեղի է ունեցել հապճեպ, առանց ինձ հետ քննարկելու, անգամ առանց ինձ տեղեկացնելու»,- գրել է Սողոմոնյանը։

ԵՊՀ մամուլի խոսնակ Քնար Միսակյանը Factor.am-ին փոխանցեց, որ ոչ մեկ չի հեռացվել, դասախոսների հետ որոշակի ժամկետով կնքված պայմանագրերը չեն երկարացվել՝ տարբեր պատճառներով։

Միսակյանից հետաքրքրվեցինք՝ արդյո՞ք Աբրահամ Գասպարյանի և Մենուա Սողոմոնյանի հետ աշխատանքային պայմանագրերը չշարունակելու պատճառը Բագրատ արքեպիսկոպոս Գալստանյանի առաջնորդությամբ ցույցերին մասնակցելը չի եղել։

«Չէ՛, կապ չունի, որովհետև ամբիոներում կան դասախոսներ, որոնք մասնակցել են ցույցերին, բայց իրենց պայմանագրերը շարունակվում են»,- ասաց ԵՊՀ մամուլի խոսնակը։

Անի Թամրազյան