Փաշինյանի առաջարկն Ադրբեջանը չի ընդունի, պայմանագիր չի կնքի, թշնամանքի քաղաքականությունը կշարունակի․ Նարեկ Սուքիասյան․ ՏԵՍԱՆՅՈՒԹ

Հայաստանն ադրբեջանական կողմին է փոխանցել խաղաղության պայմանագրի 10-րդ փաթեթը: Եվ դատելով Նիկոլ Փաշինյանի՝ ասուլիսում հայտնած տեղեկություններից, նորությունն այն է, որ Երևանը նոր առաջարկ է ներկայացրել Բաքվին՝ ստորագրել այն հոդվածների տակ, որոնք արդեն համաձայնեցվել են՝ մյուսների քննարկումը թողնելով ապագային։ Համաձայնեցված է համաձայնագրի 17 հոդվածից 13-ը, և 3 հոդվածի բառապաշարի մեծ մասը: Եվ հիմա գլխավոր հարցերից է, թե արդյո՞ք Ադրբեջանը կընդունի առաջարկը։ Օրերս Ալիևը մեղադրում էր, թե. «Հայաստանը շահագրգռված չէ խաղաղության համաձայնագրով և տարածաշրջանում կայուն խաղաղության հասնելու։ Հայաստանը միտումնավոր ժամանակ է ձգում, նոր զենքեր է գնում Ֆրանսիայից, այլ արևմտյան երկրներից, իր տարածքում երրորդ կողմերի հետ անցկացնում է զորավարժություններ»։

Քաղաքագետ, Քաղաքակրթական և մշակութային հետազոտությունների կենտրոնի գիտաշխատող Նարեկ Սուքիասյանը Factor TV-ի հետ զրույցում ասում է, որ ինքը թերահավատ է, թե Ադրբեջանը կընդունի պաշտոնական Երևանի առաջարկը, և կկնքի պայմանագիր․ «Ադրբեջանը չի ընդունի Նիկոլ Փաշինյանի առաջարկը և չի կնքի խաղաղության պայմանագիր 17-ից 13 համաձայնեցված հարցերով։ Ադրբեջանը թշնամանքի քաղաքականությունը կշարունակի, քանի որ Ալիևի իշխանությունը լեգիտիմություն է ստանում թշնամանքից՝ ադրբեջանցիների վրա դա ծախելով, նրանց զրկանքների ենթարկելով՝ ճնշումներ և ռեպրեսիաներ է կիրառում»։

Քաղաքագետը մեկնաբանելով Ադրբեջանի իշխանության մեղադրանքները ՀՀ-ին՝ բանակը զինելու վերաբերյալ, նշում է, որ այդպիսով՝ Ադրբեջանը ռազմական ագրեսիա է նախապատրաստում ՀՀ-ի դեմ։ Նարեկ Սուքիասյանը պատասխանել է նաև Արցախ հայերի վերադարձի հավանականության, ռուս-ուկրաինական պատերազմի վերաբերյալ հարցերին։

Հարցազրույցն ամբողջությամբ՝ տեսանյութում։

Ռոբերտ Անանյան