06.10.2026 | 23:14
Դեսպան Մկրտչյանը Վաշինգտոնում հյուրընկալել է Նոբելյան մրցանակի դափնեկիր Քայլաշ Սաթյարթիին
Սպանություն Այգավան գյուղում. 29-ամյա դանակահարողը կալանավորվել է
Հասարակություն
02.09.2024 | 13:45
Օգոստոսի 30-ին, կեսգիշերից քիչ անց, «Վեդի» բժշկական կենտրոնից ահազանգել են ոստիկանության Արարատի մարզի օպերատիվ կառավարման կենտրոն. հարազատները հիվանդանոց էին տեղափոխել Այգավան գյուղի բնակիչ 32-ամյա Մնացական Հարությունյանի դիակը` բազմաթիվ կտրած-ծակած վերքերով․ տեղեկացնում են ՆԳՆ ոստիկանությունից։
Հաղորդումը փոխանցվել է ոստիկանության Արարատի բաժին, որտեղից էլ օպերատիվ խումբը մեկնել է հիվանդանոց:
Հաջողվել է պարզել, որ դեպքը տեղի է ունեցել Մնացական Հարությունյանի տան դիմաց՝ հիվանդանոցային ահազանգից մոտ կես ժամ առաջ. նրա կրծքին ու պարանոցին դանակի հարվածներ էր հասցրել մի երիտասարդ, որի միայն անունն էր հայտնի:
Վեդիի քննչական բաժնում նախաձեռնվեց քրեական վարույթ: Հետագա գործողություններով պարզվեց, որ դանակահարողը 29-ամյա երիտասարդ է` հաշվառված նույն գյուղի նույն փողոցում: Նրան հայտնաբերելու հարցում օգնության եկան քրեական ոստիկանության գլխավոր և Արարատի մարզային վարչությունների ծառայողները: Նույն օրը, ժամը 17.30-ին, 29-ամյա երիտասարդը հայտնաբերվեց Երևանի Տիտոգրադյան փողոցում, ձերբակալվեց ու տեղափոխվեց նախաքննական մարմին:
Հանցագործության գործիք կենցաղային դանակը հայտնաբերվել է:
Դատարանի որոշմամբ դանակահարողը կալանավորվել է:
Երիտասարդների միջև ծագած վեճի պատճառն ու դեպքի մյուս հանգամանքները նախաքննությամբ պարզվում են:
