Քամալա Հարրիսն առաջին հարցազրույցն է տվել որպես նախագահի թեկնածու

ԱՄՆ նախագահի դեմոկրատ թեկնածու Քամալա Հարրիսը որպես նախագահի թեկնածու առաջին խոշոր հեռուստատեսային հարցազրույցն է տվել։ Հարրիսը և նրա փոխնախագահի թեկնածու Թիմ Ուոլսը CNN-ի եթերում են եղել օգոստոսի 29-ին: Հաղորդավարուհի Դանա Բաշի հարցերին ի պատասխան՝ նա փորձել է արդարացնել որոշ ավելի ազատական դիրքերից իր հեռանալն և պնդել է, որ «իր արժեքները չեն փոխվել»:

Այսպես, Քամալա Հարրիսն հայտարարել է, որ ձգտելու է խստացնել ներգաղթի մասին օրենքները և հաստատել է, որ չի հրաժարվի Իսրայելին զենք մատակարարելուց։ Նա հավելել է, որ հաղթանակի դեպքում կարող է պատկերացնել, որ հանրապետականները կմիանան իր կաբինետին: Նախագահի թեկնածուն, սակայն, կոնկրետ անուններ և պաշտոններ չի նշել՝ ասելով, որ «ընտրություններին մնացել է 68 օր», և ինքը չի ցանկանա կանխորոշել իրադարձությունները։

Հանրապետական կուսակցությունում շատերը քննադատել են Քամալա Հարրիսին ամերիկյան քաղաքականության մեջ «նոր դարաշրջան» սկսելու խոստման համար և հարցնում են, թե ինչո՞ւ նա դա չի արել փոխնախագահի պաշտոնում 3,5 տարիների ընթացքում:

Ի պատասխան՝ քաղաքական գործիչն ասել է, որ վերջին տասնամյակում Դոնալդ Թրամփն է տիրել ասպարեզին։ Նա հայտարարել է, որ Թրամփի ժամանակաշրջանում «առաջնորդի ուժի չափանիշն» ուրիշներին ենթարկելու նրա կարողությունն էր, բայց «իսկական չափանիշը» ոգեշնչելու կարողությունն է»։

Թիմ Ուոլցն իր հերթին նշել է, որ պատրաստ է ընդունել իր սխալները, երբ դրանք թույլ տա։ Այսպիսով, 2018 թվականին, խոսելով հրազենային բռնության մասին, Մինեսոտայի ներկայիս նահանգապետն ասել է, որ ինքն ատրճանակ է կրել «պատերազմի ժամանակ»։ Իրականում, Ուոլցը 24 տարի ծառայել է ԱՄՆ Ազգային գվարդիայում (պահեստային կազմավորում) և երբեք չի եղել մարտական գոտում։

Ըստ AP-ի՝ Հարրիսը, որը մեղադրվում էր քարոզարշավի առաջին ամսվա ընթացքում լրագրողների հետ զրույցներից խուսափելու մեջ, հարցազրույց է տվել, որն «ուշագրավ է հիմնականում նրանով, թե որքան սովորական էր այն»:

Իր հերթին, The Wall Street Journal-ը (WSJ) գրել է, որ Հարրիսը շարունակում է խոցելի մնալ հարձակումների նկատմամբ, մասնավորապես, տնտեսական և անվտանգության հարցերում ԱՄՆ նախագահ Ջո Բայդենի քաղաքականությանը բացահայտ աջակցության համար: Սա Թրամփին հարձակման տեղ է տալիս, «եթե նա, իհարկե, օգտվի» այս հնարավորությունից, հավելել է պարբերականը։