30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Իսրայելը համաձայնել է Գազայում պոլիոմիելիտի պատվաստումների համար մարդասիրական դադարի․ ԱՀԿ
Քաղաքականություն
30.08.2024 | 13:09
Առողջապահության համաշխարհային կազմակերպության (ԱՀԿ) բարձրաստիճան պաշտոնյան հայտնել է, որ Իսրայելը համաձայնել է մի քանի օր շարունակ ինը ժամանոց մարդասիրական դադարների, մինչ պոլիոմիելիտի զանգվածային պատվաստումներ կիրականացվեն Գազայի հատվածում, որտեղ այս ամիս հիվանդության առաջին դեպքն է հայտնաբերվել նորածնի մոտ, փոխանցում է VOA-ն:
«Արշավը կսկսվի սեպտեմբերի 1-ին Գազայի կենտրոնական հատվածում և կտևի երեք օր։ Պատվաստումների ժամանակ երեք օրով մարդասիրական դադար կհայտարարվի»,- Գազայի հատվածից տեսակապի միջոցով լրագրողներին ասել է Պաղեստինի տարածքում ԱՀԿ ներկայացուցիչ Ռիկ Պիպերկորնը:
Նրա խոսքով՝ դադարը կգործի տեղական ժամանակով 6:00-ից 15:00-ն: Դադարները համաձայնեցվել են իսրայելական COGAT գործակալության հետ, որը համակարգում է մարդասիրական մուտքը Գազայի հատված։
Պիպերկորնն ասել է, որ առաջին երեք օրերից հետո կարելի է եզրակացնել, թե որքանով է նպատակահարմար երկարաձգել հրադադարը ևս մեկ-երկու օրով, որպեսզի կարողանան Գազայի հատվածի կենտրոնական հատվածում բավարար թվով երեխաների պատվաստել: Պատվաստման խմբերն այնուհետ կտեղափոխվեն անկլավի հարավ, հետո՝ հյուսիս:
Ակնկալվում է, որ յուրաքանչյուր տարածքում պատվաստումները կտևեն երեքից հինգ օր:
