Ի՞նչ զարգացումներ են սպասվում Փաշինյան-Պուտին հանդիպումից հետո․ ՏԵՍԱՆՅՈՒԹ

Հայաստանի վարչապետ Նիկոլ Փաշինյանը վաղը կհանդիպի Ռուսաստանի նախագահ Վլադիմիր Պուտինի հետ:  Նրա օգնական Յուրի Ուշակովը նախօրեին հայտարարել է, որ այդ  հանդիպումից ակնկալում են «անկեղծ ու լուրջ» քննարկում՝ նշելով միայն, որ  քննարկվելու են  երկկողմ համագործակցությանը և միջազգային կառույցներում համատեղ աշխատանքին վերաբերող հարցեր:

Իսկ այդ ընթացքում հայ-ռուսական հարաբերություններում առաջացած լարվածության մասին են խոսում ինչպես ռուս, այնպես էլ որոշ հայ փորձագետներ՝ մատնանշելով Սերգեյ Լավրովի վերջին հայտարարություններն ու դրանց Փաշինյանի տված պատասխանը:

Հիշեցնենք, որ արձագանքելով մարտի 1-ի գործով առաջադրված մեղադրանքների հետ կապված Լավրովի հայտարարություններին՝ Փաշինյանն ասել էր, թե Հայաստանում  նոր իրավիճակ է ու բոլորը պետք է ադապտացվեն դրան։

Օրերս էլ, արձագանքելով Լավրովի  նոր հայտարարությանը, թե Հայաստանում վիճակը եռում է, Փաշինյանը հեգնել էր, թե՝ իսկապես շոգ է Երեւանում: Այս համապատկերում ուշագրավ էր նաեւ Պուտինի ջերմ շնորհավորանքը «Մարտի 1-ի» գործով մեղադրյալ Ռոբերտ Քոչարյանին ծննդյան առթիվ:

 Այսօր էլ հայտնի դարձավ, որ Ռուսաստանը դադարեցրել է«Մարտի 1-ի» գործով  մեկ այլ մեղադրյալի՝ ՀՀ պաշտպանության նախկին նախարար Միքայել Հարությունյանի նկատմամբ հետախուզումը:  

Համադրելով այս ուղերձները՝ փորձագետները պնդում են, որ հայ-ռուական հարաբերություններն այսօր լավագույն ժամանակները չեն ապրում:

Արդյո՞ք իրոք կա լարվածություն հայ ռուսական հարաբերություններում եւ որքանով կհաջողվի այն թոթափել առաջիկա հանդիպման ընթացքում:

Թեմայի շուրջ Factor.am-ը զրուցել ԱԺ փոխնախագահ Էդուարդ Շարմազանովի,  ՀՀԿ խմբակցության պատգամավոր Գալուստ Սահակյանի, ԱԺ «Ծառուկյան» խմբակցության պատգամավոր Նապոլեոն Ազիզյանի, ԱԺ «Ծառուկյան» խմբակցության պատգամավոր Նաիրա Զոհրաբյանի և ԱԺ «Ելք» խմբակցության պատգամավոր Գևորգ Գորգիսյանի հետ:

Մանրամասները՝ տեսանյութում:

Շողիկ Գալստյան