22.11.2024 | 14:28
Գևորգ Պապոյանն ընդունել է ՀՀ-ում Նիդերլանդների դեսպանին
Այս տարվա ընթացքում տեսչական մարմինը մոտ 3 մլրդ դրամի վարչական ակտ է կազմել. Սլավիկ Սարգսյան․ ՏԵՍԱՆՅՈՒԹ
28.08.2024 | 12:57
Առողջապահական և աշխատանքի տեսչական մարմինը միայն այս տարվա ընթացքում արդեն 3 մլրդ դրամի վարչական ակտ է կազմել, ինչը 6 անգամ ավելի է, քան 2023-ին էր Այս մասին այսօր հրավիրված մամուլի ասուլիսի ժամանակ հայտնել է Առողջապահական և աշխատանքի տեսչական մարմնի ղեկավար Սլավիկ Սարգսյանը։ Խախտումները հիմնականում վերաբերում են չգրանցված, օրենքի խախտմամբ ներմուծվող և իրացվող դեղերին, ժամկետանց դեղորայքին և էլեկտրոնային դեղատոմսով դուրս գրվող դեղերը առանց դեղատոմսի վաճառելու դեպքերին։
«3 մլն 600 հազարը ժամկետանցի մասով է, 11 մլն դրամի էլեկտրոնային դեղատոմսի մասով տույժ ունենք արդեն, ու 2 մլրդ 900 մլն-ը չգրանցված և օրենքի խախտմամբ ներմուծված դեղերն են», – նշեց Սարգսյանը։
Չգրանցված, օրենքի խախտմամբ ներմուծված դեղերի դեպքում մեկ անվանում դեղի մինչև հինգ փաթեթի դեպքում տուգանքը 1 մլն դրամ է, 5 անունից ավելի դեպքում՝ 2 մլն դրամ։ Ժամկետանց դեղերի պարագայում տուգանքը 100 հազար դրամ է, իսկ դեղատոմսով դուրս գրվող դեղը առանց դեղատոմսի դուրս գրելու դեպքում 5000 դրամ տույժ է սահմանված։
«Շատ են քննարկում, համենայն դեպս, մեզ հասնում է տեղեկություն՝ վերահսկողություն քիչ է, կամ չկա, որովհետև չի հնչել։ Մենք չենք կարող ուղղակի որոշել ինչ-որ տեղ գնալ ու ասել, թե եկել ենք ձեզ մոտ ստուգենք։ Կան համապատասխան հիմքեր․ պետք է լինի առկայություն կամ ստուգման տարեկան ծրագրում ներառված լինի, կամ տեղեկատվություն, կամ դիմում-բողոք»։
Անդրադառնալով էլեկտրոնային դեղատոմսերի վաճառքի վերահսկողության մեխանիզմներին՝ Սարգսյանը նշեց, որ անկախ նրանից, թե երբ կլինի տնտեսվարողի մոտ ստուգումը, էլեկտրոնային դեղատոմսով դուրս գրվող դեղերի վաճառքը անժամկետ պահպանվում է և դիտարկվելու է դրանց խախտումների առկայությունը հենց 2024 թվականի մարտի 1-ի վաճառքից սկսած։
Անի Թամրազյան
