07.10.2026 | 23:48
Արթուր Դանիելյանը կալանավորվեց
2018թ․ Մակրոնը Դուրովին առաջարկել է Telegram-ի կենտրոնակայանը տեղափոխել Փարիզ․ WSJ
Քաղաքականություն
28.08.2024 | 12:34
2018 թվականին Ֆրանսիայի նախագահ Էմանուել Մակրոնը Պավել Դուրովին առաջարկել է Telegram-ի կենտրոնակայանը տեղափոխել Փարիզ։ Դուրովը հրաժարվել է։ Այս մասին գրում է The Wall Street Journal-ը՝ հղում անելով իր աղբյուրներին։
Դուրովն ու Մակրոնը հանդիպել են ճաշի սեղանի շուրջ, որի ընթացքում Ֆրանսիայի նախագահը քննարկել է գործարարին Ֆրանսիայի քաղաքացիություն տրամադրելու հարցը, պատմել են WSJ-ի զրուցակիցները։
Մակրոնի հետ այս հանդիպումից մեկ տարի առաջ Ֆրանսիայի հետախուզական ծառայությունները համատեղ գործողություն են իրականացրել ԱՄԷ-ի հետախուզական ծառայությունների հետ, որի շրջանակում կոտրել են Դուրովի iPhone-ը։ Աղբյուրների խոսքով՝ «Մանուշակագույն երաժշտություն» կոչվող գործողության պատճառը ֆրանսիական հետախուզական ծառայությունների մտահոգությունն էր, որ «Իսլամական պետությունը» մեսենջերն օգտագործում է զինյալների հավաքագրելու և հարձակումներ ծրագրելու համար։
Դուրովին մոտ կանգնած աղբյուրի համաձայն՝ Telegram-ը երկար տարիներ անտեսել է իրավապահ մարմինների ծանուցումները և դատական կարգադրությունները, որոնք պահանջում էին համագործակցել իշխանությունների հետ՝ հարթակում անօրինական բովանդակության տարածումը զսպելու համար:
Ըստ WSJ-ի՝ որևէ փաստ չկա, որ Մակրոնի հետ հանդիպումը կամ Դուրովի հեռախոսը կոտրելը դեր են խաղացել նրա կալանավորման հարցում, սակայն այս մանրամասները «լույս են սփռում» Ֆրանսիայի և ԱՄԷ-ի հետ նրա հարաբերությունների վրա։
Հիշեցնենք՝ Պավել Դուրովը Փարիզի օդանավակայանում ձերբակալվել է օգոստոսի 24-ի երեկոյան։ Օգոստոսի 26-ին Փարիզի դատախազությունը մամուլի հաղորդագրություն է հրապարակել, որից հետևում է, որ Դուրովը կալանավորվել է անհայտ անձանց դեմ քրեական հետաքննության շրջանակում՝ 12 հոդվածով հանցագործության հատկանիշներով։
