Պայթյուն ու հրդեհ Ռոստովի և Վորոնեժի մարզերում ուկրաինական ԱԹՍ-ների հարվածներից հետո․ ՏԵՍԱՆՅՈՒԹ

Օգոստոսի 28-ի գիշերը Ռոստովի մարզում հրդեհ է բռնկվել Կամենսկի շրջանի Մոլոդեժնի գյուղի մոտ գտնվող նավթի պահեստում։ Ականատեսները հայտնել են, որ դրան նախորդել է ուժեղ պայթյուն։ Վորոնեժի մարզի նահանգապետն էլ հայտնել է, որ հրդեհ է բռնկվել «պայթյունավտանգ ոօբյեկտների մոտ», երկու բնակավայր է տարհանվել,  փոխանցում է Current Time-ը։

Օգոստոսի լույս 28-ի գիշերը ռուսական տելեգրամ ալիքները, վկայակոչելով ականատեսներին, հայտնել են Ռոստովի մարզի Կամենսկի շրջանի նավթի պահեստում ուժեղ հրդեհի մասին։

«Ռոստովի մարզում հնչած ուժեղ պայթյունից հետո Կամենսկի շրջանում այրվում է նավթի պահեստ»,- գրում է «Էտո Ռոստով նովոստի» տելեգրամ ալիքը։

Ինչպես հայտնում է Baza տելեգրամ ալիքը, նավթի պահեստի վրա հարձակումը տեղի է ունեցել գիշերը մոտ ժամը 3-ին, երկու անօդաչու թռչող սարք ընկել է տարածքի վրա։ Այս պահին այրվում է նավթով լցված երեք տարա։ Նախնական տվյալներով՝ զոհեր և վիրավորներ չկան։
Ինչպես հայտնում է Astra տելեգրամ ալիքը՝ տեղի բնակիչներին հղումով, Ռոստովի մարզի Կամենսկի շրջանում այրվում է Ռոսռեզերվի «Ատլաս» գործարանը։ Նշվում է, որ գործարանը նավթամթերք է մատակարարում ռուսական բանակին։
Վորոնեժի մարզում «անօդաչու թռչող սարքի բեկորներն ընկել են պայթյունավտանգ օբյեկտների մոտ», տարհանվել են երկու բնակավայրեր, ասել է նահանգապետ Ալեքսանդր Գուսևը։ Նրա խոսքով՝ օգոստոսի 28-ի վաղ առավոտյան տարածաշրջանում խոցվել է ուկրաինական անօդաչու թռչող սարք։
Նրա խոսքով՝ օպերատիվ ծառայությունները որոշել են ժամանակավորապես տարհանել երկու բնակավայրերի բնակիչների։
«Հրդեհը մարվել է տեղի ուժերով. Բնակիչները վերադառնում են իրենց տները»,- ասում է Վորոնեժի շրջանի ղեկավարը։

Astra տելեգրամ ալիքը, վկայակոչելով տեղի բնակիչներին, գրում է, որ անօդաչու թռչող սարքերը հարվածել են Մալայա Մեժենկա գյուղում գտնվող զինամթերքի պահեստին։

«Այս գյուղի և Եվստրատովկա գյուղի բնակիչները սկզբում տարհանվել են, բայց այժմ նրանց թույլ են տալիս վերադառնալ տուն»,- գրում է Astra-ն։