Արտաշատի համայնքապետը հողամասեր է գնել ու ինքն իրեն թույլտվություն տվել եղած շինությունները քանդելու վերաբերյալ

Արտաշատի համայնքապետ Կառլեն Մկրտչյանը 2023 թվականին հիփոթեքային վարկով 2 հողամաս է գնել նույն համայնքում։ Այս մասին Factor.am-ը տեղեկանում է համայնքապետի ներկայացրած հայտարարագրից։ 

Նա հողամասերից մեկի համար վճարել է 14 մլն 800 հազար դրամ, մյուսի համար՝ 14 մլն դրամ։ Հետաքրքրական է, որ նա հայտարարագրում նշել է, որ հողամասերի վրա եղած շինությունները քանդել է համայնքապետի որոշմամբ։ Այս դեպքում նա հղում է կատարում հենց իր որոշմանը։ 

«Տնամերձ հողամասեր՝ քանդման ենթակա հին հողից շինություններով, ձեռք բերելուց հետո քանդել ենք համաձայն Արտաշատ համայնքի ղեկավարի թիվ՝ Ք-1929 որոշման»: 

Մկրտչյանը հողամասերը գնել է 2023 թվականի դեկտեմբերին, շինությունները քանդելու որոշումը կայացվել է 2024 թվականի ապրիլին։ 

«Սերինե Գալուբյանին և Կառլեն Մկրտչյանին տրամադրել Արտաշատ համայնքի Արտաշատ քաղաքի Ա․ Մյասնիկյան փողոց թիվ 102-104 հասցեում գտնվող՝ 03-001-0022-0071 կադաստրային ծածկագրով բնակավայրերի բնակելի կառուցապատման հողամասում՝ ըստ անշարժ գույքի նկատմամբ իրավունքների պետական գրանցման N 31012024-03-0002 վկայականի՝ թիվ 1, թիվ 2, թիվ 3, թիվ 4, թիվ 5, թիվ 6, թիվ 7 և թիվ 8 շինությունների ամբողջությամբ քանդման թույլտվություն /քանդման թույլտվությունը կցվում է/»։

Ստացվում է, որ Արտաշատի համայնքապետը նախ գնել է հողամասերը, ապա ինքն իրեն շինությունները քանդելու թույլտվություն տվել։ Նա տարվա ընթացքում Արտաշատի համայնքապետարանից որպես աշխատավարձ ստացել է շուրջ 6,7 մլն դրամ։ 5,8 մլն դրամ ուղղել է վարկի մարմանը։ Այլ եկամուտներ նշված չեն։ Շուրջ 4 մլն դրամ կանխիկ է հայտարարագրել։ 

Մկրտչյանը այս հողամասերից բացի ևս մեկ հողամաս ունի Արտաշատում, որը նա 2005 թվականին ստացել է որպես ժառանգություն։ 

Նա 90 օր և ավելի փաստացի տիրապետում է 2022 թվականի արտադրության Toyota մակնիշի մեքենայի։ 

Նրա կինը՝ Սերինե Գալուբյանը, անհատ ձեռնարկատեր է իր անունով ԱՁ-ում։ Նա տարվա ընթացքում այս ԱՁ-ից ստացել է 4 մլն 360 հազար դրամ։ Համայնքապետի կինը 4 մլն 600 հազար դրամ կանխիկ է հայտարարագրել, շուրջ 56 հազար դրամ էլ՝ բանկային հաշվին։ Սերինե Գալուբյանը 1 մեքենա ունի՝ KIA մակնիշի 2015 թվականի արտադրության ձեռք բերված 2020 թվականին։ 

Բացի այդ՝ նա 2 անշարժ գույք ունի, համատեղ սեփականության հողամաս Արտաշատում, որը ձեռք է բերել 1991 թվականին, և բնակարան Արտաշատում, որը 2011 թվականին ստացել է որպես նվիրատվություն։ 

Անժելա Պողոսյան