Իսրայելում կոչ են արել լայնամասշտաբ պատերազմ սկսել «Հըզբոլլահ»-ի դեմ

Իսրայելի ազգային անվտանգության նախարար Իտամար Բեն Գվիրը Իսրայելի պաշտպանության նախարար Յոավ Գալանտին կոչ է արել չսահմանափակվել «մեկ հաջող կանխարգելիչ հարձակումով», այլ լայնածավալ պատերազմ սկսել լիբանանյան «Հըզբոլլահ» շարժման հետ։

«Իսրայելը չպետք է բավարարվի մեկ հաջող կանխարգելիչ գրոհով, մենք պետք է վճռական պատերազմ սկսենք «Հըզբոլլահ»-ի դեմ, որը կվերացնի հյուսիսում առկա սպառնալիքը և թույլ կտա բնակիչներին ապահով տուն վերադառնալ»,- գրել է քաղաքական գործիչը X սոցիալական ցանցի իր էջում։

Բեն Գվիրի խոսքով՝ պաշտպանության նախարարը «պետության համար կործանարար քաղաքականություն» է վարում ինչպես պաղեստինյան ՀԱՄԱՍ շարժման, այնպես էլ «Հըզբոլլահ»-ի դեմ պայքարում, այն ժամանակ, երբ անհրաժեշտ է վճռականորեն գործել:

Լիբանանյան «Հըզբոլլահ» շարժումը և Իսրայելը կիրակի հրթիռային հարվածներ են փոխանակել։ «Հըզբոլլահ»-ը հայտարարել է, որ արձակվել է ավելի քան 320 հրթիռ և տասնյակ անօդաչու թռչող սարքեր՝ թիրախավորելով, ընդհանուր առմամբ, 11 իսրայելական ռազմական օբյեկտներ, այդ թվում՝ Իսրայելի կողմից վերահսկվող Գոլանի բարձունքներում:

Իսրայելի վարչապետ Բենիամին Նեթանյահուն իր հերթին հայտարարել է, որ իսրայելական ուժերը կիրակի առավոտյան կանխարգելիչ հարված են հասցրել «Հըզբոլլահ»-ի թիրախներին և ոչնչացրել հազարավոր հրթիռներ այն բանից հետո, երբ հետախուզությունը Իսրայելի տարածքին հարվածելու նախապատրաստության նշաններ է հայտնաբերել:

Իսրայելացի զինվորականները հայտնել են, որ ռազմաօդային ուժերի մոտ 100 ինքնաթիռներ մասնակցել են «Հըզբոլլահ»-ի օբյեկտների ու զինատեսակների ոչնչացման գործողությանը։ Նրանց գնահատմամբ՝ հարձակման արդյունքում Իսրայելին հասցված վնասը գնահատվում է նվազագույն։