27.12.2025 | 11:40
Բալահովիտում ավտոմեքենա է այրվել
ԵԽԽՎ տասնյակ պատգամավորների մուտքն Ադրբեջան արգելվել է
Քաղաքականություն
26.08.2024 | 14:27
Եվրոպայի խորհրդի խորհրդարանական վեհաժողովում (ԵԽԽՎ) ադրբեջանական պատվիրակության լիազորությունները չվավերացնելու որոշմանը կողմ քվեարկած պատգամավորներն Ադրբեջանում պերսոնա նոն գրատա են հայտարարվել։ Քանի դեռ ԵԽԽՎ-ում ադրբեջանական պատվիրակության մանդատը չի վերականգնվել, նրանց թույլ չեն տա մուտք գործել Ադրբեջանի տարածք։ Այս մասին հայտարարել է Ադրբեջանի ԱԳՆ խոսնակ Այխան Հաջիզադեն՝ մեկնաբանելով ԵԽԽՎ անդամ, Գերմանիայի խորհրդարանի պատգամավոր Ֆրանկ Շվաբեի հայտարարությունները «Ազատություն» ռադիոկայանին տված հարցազրույցում։
Շվաբեն ասել է, որ Ադրբեջանը շահագրգռված չէ անդամակցել Եվրոպայի խորհրդին, քանի որ երկիրը «չի հարգում այդ կազմակերպության արժեքները»։ Նա նաև նշել է, որ Ադրբեջանը կրկին չի հրավիրել ԵԽԽՎ դիտորդներին Միլլի Մեջլիսի ընտրություններին։ Միաժամանակ, Շվաբեն հայտնել է, որ մտադիր է գնալ Ադրբեջան՝ մասնակցելու COP29-ին։
Հիշեցնենք, որ հունվարի 24-ին ԵԽԽՎ-ն 1 տարի ժամկետով չի հաստատել Ադրբեջանի պատվիրակության լիազորությունները՝ ԵԽ-ի առաջ երկրի «հիմնական պարտավորությունները չկատարելու» պատճառով։ Այս որոշմանը կողմ է քվեարկել 76 պատգամավոր, 10-ը՝ «դեմ», 4-ը «ձեռնպահ»։
