15.07.2026 | 15:38
ՀԷԿ-երից մեկի տարածքում շինության բետոնե ծածկ է փլուզվել․ 2 տուժած դուրս է բերվել փլատակներից
Ադրբեջանի իշխանությունները պետք է վերացնեն Abzas media-ի աշխատակիցներին առաջադրված բոլոր մեղադրանքները․ Լրագրողների պաշտպանության կոմիտե
Քաղաքականություն
21.08.2024 | 23:30
Նյու Յորքում գործող Լրագրողների պաշտպանության կոմիտեն հայտարարություն է տարածել՝ կոչ անելով Ադրբեջանի իշխանություններին վերացնել ադրբեջանական ընդդիմադիր Abzas Media-ի լրագրողներին առաջադրված բոլոր մեղադրանքները և ազատ արձակել նրանց, փոխանցում է Turan գործակալությունը։
«Քննիչները յոթ նոր մեղադրանք են առաջադրել Abzas Media-ի լրագրողներին տնտեսական հանցագործությունների համար: Ադրբեջանի իշխանությունների՝ բանտարկված հետաքննող լրագրողների դեմ նոր մեղադրանքներ առաջադրելու քայլը վկայում է վրեժխնդրության մասին մի պարբերականի դեմ, որը համարձակորեն բացահայտում է բարձր մակարդակի կոռուպցիան»,- ասել է Լրագրղների պաշտպանության կոմիտեի Եվրոպայի և Կենտրոնական Ասիայի հարցերով ծրագրի համակարգող Գուլնոզա Սաիդը:
«Իշխանությունները պետք է հանեն բոլոր մեղադրանքները Abzas Media-ի աշխատակիցների դեմ և անհապաղ ազատ արձակեն բոլոր լրագրողներին, որոնք կալանավորվել են, իբր, արևմտյան ֆինանսական աջակցություն ստանալու համար», – հավելել է նա:
Ադրբեջանի իշխանությունները ձերբակալել են Abzas Media-ի տնօրեն Ուլվի Հասանլիին, գլխավոր խմբագիր Սևինջ Վագիֆքըզիին, ծրագրի համակարգող Մոհամմադ Կեկալովին, ինչպես նաև լրագրողներ Հաֆիզ Բաբալիին, Նարգիզ Աբսալամովային, Էլնարա Գասիմովային՝ 2023 թվականի նոյեմբերից 2024 թվականի հունվար ամիսներին արժույթի մաքսանենգության մեղադրանքով։ Ընդհանուր առմամբ, ձերբակալվել է չորս անկախ լրատվամիջոցների 13 աշխատակից, որոնք մեղադրվում են արժույթի մաքսանենգության մեջ արևմտյան դոնորների ենթադրյալ ֆինանսավորման միջոցով՝ Ադրբեջանի և Արևմուտքի միջև հարաբերությունների վատթարացման պայմաններում:
