07.10.2026 | 20:18
Ավինյանի խոստումից 4 ամիս անց․ ինչու է դադարել Արին Բերդի փողոցի 1 մլրդ դրամանոց հիմնանորոգումը. ՏԵՍԱՆՅՈՒԹ
Հարձակումը Կուրսկի շրջանում պետք է համոզի Մոսկվային՝ գնալ ազնիվ բանակցությունների․ Պոդոլյակ
Քաղաքականություն
16.08.2024 | 21:08
Ուկրաինայի նախագահի գրասենյակի ղեկավարի խորհրդական Միխայիլ Պոդոլյակը կրկնել է՝ Կիևը շահագրգռված չէ ռուսական տարածքների օկուպացմամբ, Կուրսկի շրջանում հարձակումն անհրաժեշտ է, որպեսզի համոզեն Մոսկվային մտնել «ազնիվ բանակցային գործընթաց», գրում է BBC-ի ռուսական ծառայությունը։
«Եթե մենք խոսում ենք պոտենցիալ բանակցությունների մասին, ընդգծում եմ՝ պոտենցիալ, մենք ստիպված կլինենք Ռուսաստանի Դաշնությանը նստեցնել բանակցային սեղանին՝ մեր սեփական պայմաններով: Մենք բացարձակապես պլաններ չունենք աղերսելու՝ «խնդրո՛ւմ ենք, եկեք բանակցենք»։ Փոխարենը մենք ունենք ստիպելու ապացուցված և արդյունավետ միջոցներ։ Բացի տնտեսականից ու դիվանագիտականից՝ դա նաև ռազմական գործիքն է»,- գրել է նա X սոցիալական ցանցում։
«Մենք պետք է զգալի մարտավարական պարտության մատնենք Ռուսաստանին։ Կուրսկի մարզում մենք տեսնում ենք, թե ինչպես է ռազմական գործիքն օբյեկտիվորեն օգտագործվում՝ համոզելու Ռուսաստանի Դաշնությանը մտնել ազնիվ բանակցային գործընթացի մեջ»,- հավելել է Պոդոլյակը։
Մեկ այլ կարևոր գործիք, նրա խոսքով, Ռուսաստանի ներսում հասարակական կարծիքի վրա ազդելն է, որը սկսեց փոխվել այն բանից հետո, երբ մարտերն Ուկրաինայից տեղափոխվեցին ՌԴ տարածք:
«Ռուսաստանի բնակչության հոգեբանական վիճակի բացասական փոփոխությունները ևս մեկ փաստարկ կլինեն բանակցություններ սկսելու օգտին»,- հավելել է ուկրաինացի պաշտոնյան:
