Հանրապետական կուսակցության համար աշխատած մարդիկ կարող եք գտնել գրեթե բոլոր ուժերի շտաբերում. Էդմոն Մարուքյան. ՏԵՍԱՆՅՈՒԹ

Իշխանությունն ունի քաղաքական կամք՝ անգամ օրենսդրական մակարդակում ընտրակեղծիքների դեմ պայքարելու: Այս մասին այսօր Factor.am-ի հետ զրույցում ասաց «Լուսավոր Հայաստան» կուսակցության ղեկավար, ԱԺ «Ելք» խմբակցության պատգամավոր Էդմոն Մարուքյանը՝ անդրադառնալով այսօր խորհրդարանի կողմից ընտրախախտումները քրեականացնող նախագծի ընդունմանը: Հիշեցնենք՝ ԱԺ-ն 66 կողմ ձայներով առաջին ընթերցմամբ ընդունեց նշված նախագիծը:

«Ակնհայտ է, որ այսօրվա ոստիկանությունն այլևս ոչնչով կաշկանդված չէ, ընտրակաշառք տվողը բռնվելու է, ընտրակաշառք վերցնողը բռնվելու է, էս օրերին բարեգործություն անողն էլի բռնվելու է: Ովքեր այս ուղերձները չեն ընկալի, խնդիր կունենան իրավապահների հետ»,- նշեց Մարուքյանը:

Պատգամավորը պնդում է՝ չի լինելու այնպես, ինչպես նախկին իշխանությունների օրոք, երբ մարդկանց հերթ էին կանգնեցնում և կաշառք բաժանում: «Չի բացառվում, որ ինչ-որ մեկը շատ գաղտնի մեխանիզմներով փորձի բաժանել ընտրակաշառք և ոչ ոք չիմանա, բայց միևնույն է ոստիկանությունն ու ԱԱԾ-ն վեր կհանեն այդ խնդիրները»,- շարունակեց Մարուքյանը՝ հավելելով, որ որևէ մտահոգություն չունի ընտրակեղծիքների, ինչպես նաև ընտրակաշառքների բաժանման հետ կապված:

Էդմոն Մարուքյանն անդրադարձավ նաև Հանրապետականի կողմից ավագանու ընտրություններին իրենց դաշինքին աջակցելու մասին լուրերին՝ պնդելով, որ դա արվում է այն մարդկանց կողմից, որոնք «Լույս» դաշինքից վտանգ են տեսնում: «Հանրապետական կուսակցության համար աշխատած մարդիկ կարող եք գտնել գրեթե բոլոր ուժերի շտաբերում: ՀՀԿ-ն չունի ռեյտինգ, հիմա սա ի՞նչ խոսակցություն է, էդ ովքե՞ր են Հանրապետականները, էս խորհրդարանում եղած 50 հոգո՞ւ, ո՞ւմ մասին է խոսքը: Հանրապետականներն ուժ ունենային, իրենք կմասնակցեին ընտրություններին»,- ընդգծեց Մարուքյանը:

Էդմոն Մարուքյանի հետ հարցազրույցում անդրադարձել ենք նաև Նիկոլ Փաշինյան-Վլադմիր Պուտին առաջիկա հանդիպմանը, հայ-ռուսական հարաբերություններին և մի շարք այլ հարցերի: Հարցազրույցն՝ ամբողջությամբ տեսանյութում:

Շողիկ Գալստյան