ՌԴ-ն Կուրսկի մարզ է տեղափոխել մի քանի հազար զինվորականի, սակայն լուրջ ուժեր ուկրաինական ճակատից չի հանել. CNN

Ռուսաստանը Կուրսկի մարզում Ուկրաինայի գրոհները հետ մղելու համար մի քանի բրիգադներ է տեղափոխել ուկրաինական ճակատից, յուրաքանչյուրը՝ մոտ հազար մարդ, սակայն լուրջ ուժեր դեռ դուրս չի բերել այնտեղից։ Այս մասին հայտնել է ամերիկյան CNN հեռուստաալիքը՝ հենվելով հետախուզական տվյալների և այլ աղբյուրներում արդեն հրապարակված տեղեկատվության վրա։

«ՌԴ-ն հարյուր հազարներով զինվորներ ունի Ուկրաինայի ռազմաճակատում, այնպես որ, ինչպես ասում են պաշտոնատար անձինք, մի քանի հազարի տեղափոխումը, հնարավոր է, կարճ հեռանկարում ոչ մի լուրջ հետևանք չի ունենա։ Մենք դեռևս չենք տեսել զգալի տեղափոխում և չենք կարող ասել՝ ինչու, քանի որ նրանք նոր են սկսում տեղաշարժել զորքերը կամ քանի որ նրանք տեղաշարժելու բան չունեն»,- իր անանուն աղբյուրներից մեկին է մեջբերում CNN-ը։

Մեկ այլ անանուն բարձրաստիճան պաշտոնյան հեռուստաալիքին ասել է, որ ԱՄՆ հետախուզության տվյալների համաձայն՝ Ուկրաինայից զորքերի մի մասից բացի՝ ՌԴ-ն Կուրսկի մարզ է ուղարկել անձնակազմեր Լենինգրադի ռազմական օկրուգից ու Կալինինգրադից։

Մի շարք արևմտյան քաղաքական գործիչներ ու պաշտոնյաներ կարծում են, որ Ուկրաինան դժվար թե երկար կարողանա պահել Կուրսկի մարզում գրաված տարածքները, այդ պատճառով էլ չափազանց վաղ է դատել այն մասին, թե ինչպես կազդի այս օպերացիան պատերազմի ընթացքի վրա։

CNN-ը նաև պնդում է, որ իր ամերիկացի զրուցակիցների կարծիքով՝ ԱՄՆ-ն Ուկրաինային թույլ չի տալիս Կուրսկի մարզում օգտագործել մինչև 300 կմ հեռահարությամբ ATACMS մարտավարական հրթիռները ոչ այն պատճառով, որ էսկալացիայի մտավախություն ունի, այլ այն պատճառով, որ ԱՄՆ-ը չունի այդպիսի շատ հրթիռներ և, ըստ ամերիկացի զինվորականների, ավելի խելամիտ է դրանք օգտագործել միայն Ղրիմի թիրախներին հարվածելու համար։