Ուկրաինայի ԶՈՒ-ն մեկ շաբաթում գրեթե երկու անգամ ավելի շատ տարածք է գրավել, քան ռուսական բանակը` երեք ամսում

Ուկրաինայի Զինված ուժերը գրավել են մոտ 1000 քառակուսի կմ տարածք Կուրսկի շրջանում, երկրի նախագահ Վլադիմիր Զելենսկիի հետ տեսակոնֆերանսի ժամանակ ասել է ԶՈՒ գլխավոր հրամանատար Ալեքսանդր Սիրսկին, գրում է The Moscow Times-ը։

Միաժամանակ, ֆիննական «Black Bird Group» ռազմական բաց տվյալների վերլուծական ընկերությունից Պասի Պարոյնենի վերջին հաշվարկների համաձայն՝ ռուսական բանակը մայիսի 3-ից օգոստոսի 2-ը գրավել է 592 քառակուսի կմ։

Հիմնականում ՌԴ-ն առաջ է շարժվում Դոնեցկի մարզի արևելքում՝ ոչնչացնելով ոչ մեծ գյուղեր ու փորձելով գրավել Պոկրովսկը, որտեղ տեղակայված է Ուկրաինայի ԶՈւ մատակարարման խոշոր կենտրոնը, ինչպես նաև բարձունքի վրա գտնվող Չասով Յարը, որտեղից բացվում են հարևան քաղաքների վրա գրոհելու հարմար ուղիներ։ Բացի այդ, մայիսին ՌԴ ԶՈւ-ն ներխուժել է Խարկովի մարզ, սակայն նրա առաջխաղացումն այնտեղ արագ կասեցվել է։

Այսպես, մեկ շաբաթվա ընթացքում Կուրսկի մարզում ուկրաինական ստորաբաժանումները 1,7 անգամ ավելի շատ տարածք են գրավել, քան ռուսական ստորաբաժանումները՝ երեք ամսում Ուկրաինայում, որտեղ, ըստ Պարոյնենի հաշվարկների, նրանք մեկ շաբաթում առաջ են շարժվել ընդամենը 45 քառակուսի կմ-ից մի փոքր ավելի:

Դժվար է որոշել Ուկրաինայի զինված ուժերի կողմից վերահսկվող տարածքի ճշգրիտ չափը, այդ թվում՝ շարունակվող մարտերի և զորքերի մշտական տեղաշարժի պատճառով։ Երկուշաբթի Կուրսկի շրջանի նահանգապետի պաշտոնակատար Ալեքսեյ Սմիրնովը ՌԴ նախագահ Վլադիմիր Պուտինին զեկուցել է, որ ուկրաինական բանակին հաջողվել է գրավել 28 բնակավայր և 480 քառ. կմ։