09.06.2026 | 00:17
Մարկո Ռուբիոն շնորհավորել է Փաշինյանին
«Հայաստանում չկա մարդ, որն անձեռնմխելի է»․ «Մարտի 1-ի» զոհերի իրավահաջորդները վճռաբեկ բողոք են ներկայացրել
Քաղաքականություն
06.09.2018 | 15:57
Հանրապետության 2-րդ նախագահ Ռոբերտ Քոչարյանի պաշտպանները շարունակում են պնդել, որ նա անձեռնմխելի է, սակայն մենք ՝ «Մարտի 1-ի» ոճրագործության իրավահաջորդներս, պնդում ենք՝ Հայաստանում չկա մարդ, որն անձեռնմխելի է, այդիսկ պատճառով Վճռաբեկ դատարան բողոք ենք ներկայացրել՝ պահանջելով վերացնել Վերաքննիչ դատարանի որոշումը։ Այս մասին Factor.am-ի հետ զրույցում ասաց «Մարտի 1»-ի ոճրագործության զոհերից Գոռ Քլոյանի հայրը՝ Սարգիս Քլոյանը։
«Ռոբերտ Քոչարյանը անձեռնմխելի չէ և չի կարող լինել։ Մենք՝ «Մարտի 1-ի» բոլոր տասը զոհերի իրավահաջորդներս, Վճռաբեկ դատարան բողոք ենք ներկայացրել։ Մենք պահանջում ենք կալանավորել 2008թ. մարտի 1-ին սահմանադրական կարգը տապալելու մեջ մեղադրվող Ռոբերտ Քոչարյանին»,- ասաց Սարգիս Քլոյանը։
Վերջինս նշեց, որ ոճրագործության զոհերի հարազատները անհամբեր սպասում են սեպտեմբերի 20-ին, որից հետո կհրապարակվեն այս գործերով եվրոպական դատարանների վճիռները։
Հիշեցնենք, որ Ռոբերտ Քոչարյանի խափանման միջոցը փոխվեց և վերջինս դատարանի դահլիճից ազատ արձակվեց օգոստոսի 13-ին, երբ քրեական վերաքննիչ դատարանը վերացրեց Առաջին ատյանի դատարանի որոշումը:
Հավելենք նաև, որ սեպտեմբերի 4-ին Հատուկ քննչական ծառայությունը որոշում կայացրեց ՀՀ երկրորդ նախագահ Ռոբերտ Քոչարյանի նկատմամբ որպես խափանման միջոց ընտրել ստորագրությունը չհեռանալու մասին:
Աղավնի Սուքիասյան
