Հակակոռուպցիոն կոմիտեն ուսումնասիրել է սակուրաների գնման գործընթացը․ քրեական գործ հարուցելու անհրաժեշտություն չի առաջացել

Հակակոռուպցիոն կոմիտեն հաստատում է Factor.am-ի տեղեկությունները, որ Երևանի քաղաքապետարանի կողմից տնկիների գնման գործընթացի հետ կապված ստուգողական գործողություններ են իրականացվել։ Այս մասին Factor.am-ին փոխանցեցին կոմիտեից՝ արձագանքելով երեկվա մեր հրապարակմանը։

Հիշեցնենք՝ խոսքը Երևանում «կենսունակությունը կորցրած ծառերի փոխարինման» ծրագրով տնկիների գնման գործընթացի մասին է, որը հանրային լայն քննարկման առիթ էր դարձել։ Բնապահպանները քննադատում էին հաստաբուն ծառերի հատումը և փոխարինումը սակուրաներով ու այլ էկզոտիկ ծառատեսակների տնկիներով։

Մենք պարզել էինք, որ տնկիները քաղաքապետարանը ձեռք է բերել էլեկտրոնային աճուրդի միջոցով հենց «Բերրի Վորլդ»-ից, ուր օրերս այցելել է Փաշինյանը։ Աճուրդին, բացի հաղթող ճանաչված ընկերությունից, ևս երեք իրավաբանական անձ է մասնակցել՝ LA IMPORT ՍՊԸ-ն, «Արմեն Մստոյան» ԱՁ-ն և «Շինարար Արգո» ՍՊԸ-ն։ Ուշագրավ է նաև այն հանգամանքը, որ այս երեք ընկերությունները նախ աստղաբաշխական գներ են առաջարկել, բայց կեսից դադարեցրել մասնակցությունը մրցույթին։ Թե ինչու են նրանք այս քայլին դիմել, ավելի վաղ Factor.am-ին բովանդակային պատասխան չէին տվել։
Այս գործընթացը հայտնվել է նաև Հակակոռուպցիոն կոմիտեի ուշադրության կենտրոնում։ Կոմիտե են հրավիրվել աճուրդին մասնակցած ընկերությունների ներկայացուցիչները, Երևանի քաղաքապետարանի «Կանաչապատում և շրջակա միջավայրի պահպանություն» ՀՈԱԿ-ի աշխատակիցները։ Գործընթացի շրջանակներում ՀՈԱԿ-ից փաստաթղթեր է պահանջել իրավապահ կառույցը։

ՀԿԿ-ից այսօր առանց մասնավորեցնելու հաստատեցին նաև առնչվող անձանց կոմիտե հրավիրելու, ինչպես նաև փաստաթղթեր պահանջելու տեղեկությունները։ «ՀՈԱԿ-ից փաստաթղթեր են պահանջվել ստուգողական գործողությունների շրջանակներում»,-ասացին կառույցից՝ միաժամանակ նշելով, որ ստուգողական գործողություններից հետո անհրաժեշտ հիմքեր չեն հայտնաբերվել քրեական վարույթ նախաձեռնելու համար։

Երևանում թեղիների հատումից հետո տնկվող ծառերի մատակարար «Բերրի Վորլդ» ՍՊԸ-ն Երևանի քաղաքապետարանի հետ յոթ պայմանագիր է կնքել, որոնց ընդհանուր արժեքը կազմում է 198 մլն 632 հազար դրամ։

Պետական գնումների համակարգի ուսումնասիրությունից Factor TV-ն պարզել է, որ այս բազմամիլիոնանոց գործարքների մեծ մասն իրականացվել է 2023 թվականին։ Միայն 82 մլն դրամ արժեցող պայմանագիր է կնքվել այս տարի։ Նույն աղբյուրի համաձայն՝ քաղաքապետարանը ծառայությունները ձեռք է բերել էլեկտրոնային աճուրդի միջոցով։

Factor TV-ի ուսումնասիրության ընթացքում պարզել էր նաև, որ վերջին տարիների մի քանի աճուրդներում հաղթող ճանաչված ընկերության սեփականատեր Դավիթ Աբովյանը նախկինում համագործակցել է Տիգրան Ավինյանի հոր՝ Արմեն Ավինյանի հետ։ Տիգրան Ավինյանն այս թեմայով Factor.am-ի հարցին պատասխանելով նշել էր, որ կոռուպցիոն ռիսկ չի տեսնում։ Իսկ ահա հակակոռուպցիոն ոլորտի փորձագետ Վարուժան Հոկտանյանը մանրակրկիտ ուսումնասիրության անհրաժեշտություն է տեսնում։

Նարեկ Կիրակոսյան