Ադրբեջանի ԱԳՆ-ն արձագանքել է Տոյվո Կլաարի` Արցախի հայերի վերադարձի մասին հայտարարությանը

Փաստը, որ Հարավային Կովկասում ԵՄ հատուկ ներկայացուցիչ Տոյվո Կլաարը, որը շուտով ավարտելու է առաքելությունն ու ստանձնելու է Ուզբեկստանում ԵՄ դեսպանի պարտականությունները, պաշտոնից հեռանալու նախօրեին նման կողմնակալ հայտարարություններ է արել, ամենից առաջ ևս մեկ հարված է այն ինստիտուտի հեղինակությանը, որը ներկայացնում է։ Այս մասին հայտարարել է Ադրբեջանի ԱԳՆ մամուլի քարտուղարի տեղակալ Վասիֆ Ալիևը՝ ի պատասխան Արցախի հայերի վերադարձի վերաբերյալ Տոյվո Կլաարի հայտարարության։

«Անընդունելի է, որ Տոյվո Կլաարը հատուկ դեպք է համարում Ադրբեջանի Ղարաբաղի շրջանից Հայաստան և այլ երկրներ, որտեղ նրանք նախկինում ապրել են, ինքնակամ գաղթած հայերի վերադարձի հարցը և դա պայմանավորել ներկայիս Հայաստանի տարածքից բռնի տեղահանված ադրբեջանցիների վերադարձի իրավունքով: Հայաստանի պարտավորությունն է ստեղծել համապատասխան պայմաններ՝ Հայաստանից վտարված ադրբեջանցիների անվտանգ և արժանապատիվ վերադարձի համար, և միջազգային հանրությունը պետք է պահանջի այդ պարտավորության կատարումը»,- ասվում է հայտարարության մեջ։

«Տոյվո Կլաարը քաջատեղյակ է, որ հայերը մտադիր չեն վերադառնալ Ադրբեջանի ինքնիշխան տարածքներ՝ չնայած ադրբեջանական կողմի բազմաթիվ կոչերին հայ բնակիչներին՝ մնալ իրենց տներում և վերադառնալ։ Այս առումով ադրբեջանական կողմը հարգում է Ադրբեջան վերադարձնելու մտադրությունը միայն այն հայազգի անձանց, որոնք հարգում են մեր երկրի տարածքային ամբողջականությունն ու ինքնիշխանությունը»,- ասվում է ադրբեջանական ԱԳՆ-ի հայտարարությունում։

Տոյվո Կլաարը JAMnews-ին տված հարցազրույցում հայտարարել էր, որ ԼՂ հայերի՝ իրենց տներ վերադարձին նպաստելն Ադրբեջանի պարտավորությունն է։