Թուրքիայի իշխանությունները պաղեստինամետ ցուցարարների են ձերբակալել՝ ադրբեջանական SOCAR ընկերության դեմ ցույցի համար

Թուրքիայի իշխանությունները հերթական անգամ ձերբակալել են «1000 Youth for Palestine» նախաձեռնության անդամներին, որոնք բողոքում են Իսրայելին նավթ մատակարարող Ադրբեջանի պետական ​​նավթային ընկերության (SOCAR) դեմ, գրում են թուրքական լրատվամիջոցները։

Հաղորդվում է, որ թուրքական ոստիկանությունն այս անգամ ձերբակալել է «1000 Youth for Palestine» նախաձեռնության երեք անդամների։ Պաղեստինամետ ցուցարարներին, որոնք ձերբակալվել են Ստամբուլում SOCAR-ի շենքի դիմաց բողոքի ակցիայից հետո, մեղադրվում են «գույքը վնասելու», «հանրային անվտանգությունը դիտավորյալ վտանգելու» և «բողոքի ցույցերի մասին օրենքը խախտելու» համար։

Դատախազության կողմից  ցուցմունք վերցնելուց հետո նրանք ազատ են արձակվել դատական ​​հսկողությամբ՝ գիշերն անցկացնելով կալանքի տակ։

Նախաձեռնությունը X-ի իր միկրոբլոգում հայտարարություն է տարածել՝ նշելով․ «SOCAR-ի նավթով սնվող սիոնիստական ​​ինքնաթիռները սպանում են հազարավոր պաղեստինցիների և ավերում Գազայի հատվածը: Անվտանգության իրական սպառնալիքը գալիս է սիոնիստ ցեղասպաններից և նրանց կեղծավոր գործընկերներից: Մինչ Պաղեստինում շարունակվում է ցեղասպանությունը, խաղաղություն չի լինի նրանց համար, որոնք աջակցում են Իսրայելին այս հողերում»:

Նախաձեռնությունը կոչ է անում Թուրքիայի կառավարությանը խզել բոլոր հարաբերությունները Իսրայելի հետ: Խումբը բազմաթիվ բողոքի ցույցեր է կազմակերպել Ստամբուլում, այդ թվում՝ ադրբեջանական SOCAR ընկերության շենքի դիմաց։ Վերջին նման խոշոր ցույցերից մեկը տեղի է ունեցել մայիսի 31-ին, երբ ցուցարարները կարմիր ներկ էին լցրել շենքի վրա։ Դրանից հետո ոստիկանությունը շրջայցեր էր իրականացրել ակցիայի մասնակիցների տներում ու մեկ տասնյակից ավելի ցուցարարի ձերբակալել։

Էմմա Չոբանյան