Սկանդալ Իսրայելում՝ բանտարկված զինյալների հետ կոշտ վերաբերմունքի պատճառով․ պաղեստինցիները հետաքննություն են պահանջում, իսրայելցիները՝ բողոքում

Պաղեստինցի բանտարկյալներին ներկայացնող ասոցիացիան կոչ է արել միջազգային հետաքննություն անցկացնել Գազայի պատերազմի սկզբից ի վեր Իսրայելի բանտերում հայտնված բանտարկյալների նկատմամբ վատ վերաբերմունքի մասին պնդումների վերաբերյալ, գրում է BBC-ի ռուսական ծառայությունը:

Բանտարկյալների և նախկին բանտարկյալների հանձնաժողովի ղեկավար  Քադուրա Ֆարեսը խոսել է Իսրայելի հարավում գտնվող Բերշեբա քաղաքի մոտ գտնվող Սդե Թեյմանե ռազմաբազայում բռնությունների մասին բազմաթիվ հաղորդումների մասին: Բազայի առնվազն ինը իսրայելցի զինվորներ մեղադրվում են Գազայում գերի ընկած պաղեստինցի բանտարկյալի՝ ՀԱՄԱՍ-ի ենթադրյալ գրոհայինի նկատմամբ դաժան վերաբերմունքի մեջ, հաղորդում են տեղական լրատվամիջոցները: Ըստ իսրայելական լրատվամիջոցների՝ նա հոսպիտալացվել է սեռական ոտնձգությունների հետևանքով լուրջ վնասվածքներով։

Բանակային ռադիոն հայտնել է, որ ձերբակալվածը ՀԱՄԱՍ խմբավորման էլիտար ստորաբաժանման անդամ է։ Նա գերի է ընկել Գազայում հոկտեմբերի 7-ի հարձակումից հետո Իսրայելի ձեռնարկած գործողության ժամանակ։

«Ամեն օր մենք ականատես ենք լինում Գազայում մեր ժողովրդի ջարդին, լսում ենք սարսափելի վկայություններ իրավաբանական շրջանակներից և ազատ արձակված բանտարկյալներից»,- ասվում է Ֆարեսի հայտարարության մեջ:

Նրա խոսքով՝ իսրայելական հետաքննությունը և ինը իսրայելցի զինվորների կալանավորումը «ֆարս» է, որի նպատակն է մոլորեցնել միջազգային հանրությանը։

Իսրայելցի զինվորականները հայտնել են, որ հետաքննություն է նախաձեռնվել կալանավորի նկատմամբ վատ վերաբերմունքի կասկածների պատճառով: Իսրայելի պաշտպանության բանակն այլ մանրամասներ չի հայտնել:

Հետաքննությունը բողոքի ցույցեր է առաջացրել Իսրայելում։ Երկուշաբթի ցուցարարները ներխուժել են Սդե Թեյման բազա՝ փորձելով իրենց աջակցությունը ցույց տալ ձերբակալվածներին։ Բազայում մեծ բազմություն է հավաքվել այն բանից հետո, երբ Իսրայելի ռազմական ոստիկանությունը ժամանել է այնտեղ՝ ձերբակալելու պահեստազորիներին, որոնց նկատմամբ ծառայողական հետաքննություն է սկսվել։