07.10.2026 | 14:45
Արմավիրի մարզում հրդեհային անվտանգության խախտումների պատճառով 4 գազաբենզալցակայան կապարակնքվել է
Մոսկվայի դատարանը հեռակա կարգով ձերբակալել է «Գարուն» շարժման ակտիվիստներին
Քաղաքականություն
29.07.2024 | 23:17
Մոսկվայի Բասմանի դատարանը հեռակա ձերբակալել է «Գարուն» դեմոկրատական և հակապատերազմական երիտասարդական շարժման ակտիվիստներ Վլադիսլավ Սորվենկովին և Մակար Դյակոնովին։ Այս մասին հայտնել է Mediazona-ն՝ վկայակոչելով իր աղբյուրները:
Սորվենկովը մեղադրվում է վեց քրեական հոդվածներով, այդ թվում՝ նացիզմի վերականգնման և ռուսական բանակի մասին «ֆեյքերի» տարածման համար։
Հուլիսի 17-ին խափանման միջոց ընտրելիս Դյակոնովին մեղադրանք է առաջադրվել «ծայրահեղական» համայնք կազմակերպելու մասին հոդվածով, մինչդեռ ավելի վաղ նրան մեղադրել էին ՌԴ Զինված ուժերի մասին «կեղծիքներ» տարածելու, նացիզմի ռեաբիլիտացիայի և պետության անվտանգության դեմ ուղղված գործունեության հանրային կոչերի համար, նշվում է հրապարակման մեջ։
Երկու ակտիվիստներն էլ Ռուսաստանի սահմաններից դուրս են գտնվում։ Օրեր առաջ հաղորդվել էր «Գարուն» շարժման ևս երկու ակտիվիստների՝ Լև Գյամերի և Գլեբ Կոնդրատևի հեռակա կալանավորման մասին, իսկ 2023 թվականի դեկտեմբերին նմանատիպ խափանման միջոց է կիրառվել կազմակերպության համակարգող Բոգդան Լիտվինի նկատմամբ։
Միաժամանակ, «Գարուն» շարժման վեց ակտիվիստներ՝ Աննա Արխիպովան, Եվգենի Զետեևը, Յան Քսենժեպոլսկին, Վասիլի Նոյստրոևը, Պավել Սինելնիկովը և Վալենտին Խորոշենինը, նախնական կալանքի տակ են։
«Գարուն» շարժումը հակապատերազմական ակցիաներ է իրականացնում Ուկրաինա ռուսական ներխուժման սկզբից։ 2022 թվականի սեպտեմբերից ակտիվիստները նաև բողոքում են մոբիլիզացիայի դեմ։
