01.11.2024 | 16:29
Իրանը պատրաստվում է Իսրայելին հարվածել Իրաքի տարածքից
Լեհաստանի ԱԳՆ-ն Հունգարիային առաջարկում է դուրս գալ ԵՄ-ից և ՆԱՏՕ-ից ու դաշինք ստեղծել Պուտինի հետ
Քաղաքականություն
29.07.2024 | 15:31
Լեհաստանի ԱԳ փոխնախարար Վլադիսլավ Թեոֆիլ Բարտոշևսկին Հունգարիայի վարչապետ Վիկտոր Օրբանին առաջարկել է իր երկիրը դուրս բերել ԵՄ-ից ու ՆԱՏՕ-ից և միություն ստեղծել Ռուսաստանի նախագահ Վլադիմիր Պուտինի հետ, գրում է DW-ի ռուսական ծառայությունը։
«Ես իսկապես չեմ հասկանում, թե ինչու է Հունգարիան ցանկանում մնալ այն կազմակերպությունների անդամ, որոնք իրեն այդքան էլ դուր չեն գալիս, և որոնք, իբր, վատ են վերաբերվում իրեն: Ինչո՞ւ Օրբանը դաշինք չի ստեղծում Վլադիմիր Պուտինի և այդ տիպի այլ ավտորիտար պետությունների ներկայացուցիչների հետ»,- ասել է դիվանագետը Onet.pl-ի հետ զրույցում։
Նա Օրբանի քաղաքականությունը անվանել է «հակաեվրոպական, հակաուկրաինական և հակալեհական»։
Լեհաստանի ԱԳ փոխնախարարը նաև հիշեցրել է, որ Օրբանն արգելափակում է 2 մլրդ զլոտին (468 միլիոն եվրո)՝ Վարշավայի կողմից Ուկրաինային փոխանցված ռազմական տեխնիկայի փոխհատուցման համար։
«Մենք Ռուսաստանի հետ բիզնես չենք անում՝ ի տարբերություն վարչապետ Օրբանի, որը գտնվում է միջազգային հանրության բակերում՝ և՛ Եվրամիությունում, և՛ ՆԱՏՕ-ում»,- արձագանքելով Լեհաստանի հասցեին Օրբանի քննադատությանը՝ ասել է Բարտոշևսկին։
Հունգարիայի վարչապետը ավելի վաղ քննադատել էր, իր բնորոշմամբ, ԵՄ-ի և ամբողջ Արևմուտքի սխալ քաղաքականությունը, ինչպես նաև «Լեհաստանի երկերեսանիությունը»:
«Լեհերը երկերեսանի քաղաքականություն են վարում, նրանք քննադատում են մեզ Ռուսաստանի հետ մեր հարաբերությունների համար, բայց իրենք բիզնես են անում Ռուսաստանի հետ միջնորդների միջոցով։ Ես երբեք չեմ տեսել նման երեսպաշտություն պետության կողմից»,- ասել էր Օրբանը։
Բացի այդ, նա Վարշավային մեղադրել էր Եվրոպայում ուժերի հավասարակշռությունը փոխելու մեջ՝ թուլացնելով «Բեռլին-Փարիզ առանցքը՝ հօգուտ Լոնդոն-Վարշավա-Կիև-Բալթյան երկրներ-Սկանդինավիա նոր կոնֆիգուրացիայի»: Հունգարիայի վարչապետի խոսքով՝ դա ենթադրում է իր երկրի կարևորության թուլացում և տանում է «Լեհաստանի հին ծրագրի» իրականացմանը։
