Ռուս զինվորականի ավտոմեքենան պայթեցնելու մեջ կասկածվողին Թուրքիայից տեղափոխել են Մոսկվա

Ռուս զինվորականի մեքենան պայթեցնելու մեջ կասկածվող Եվգենի Սերեբրյակովը Թուրքիայից Մոսկվա է տեղափոխվել, Current Time-ի փոխանցմամբ՝ հայտնում է ՌԴ ՆԳՆ-ն։

Հուլիսի 24-ի առավոտյան Մոսկվայի Սինյավինսկայա փողոցի ավտոկայանատեղիում ավտոմեքենա է պայթել, ինչի հետևանքով տղամարդ և կին են վիրավորվել։ Լրատվամիջոցներն ու տելեգրամ ալիքները գրել են, որ մեքենայում եղել է Մոսկվայի մարզի 33790 զորամասի (Ռուսաստանի զինված ուժերի արբանյակային կապի 89-րդ կենտրոն) ռադիոկենտրոնի պետի տեղակալ Անդրեյ Տորգաշովը և նրա կինը։
Ավելի ուշ Տորգաշովի կինը՝ Մայան, հայտնել է, որ իր ամուսնու հետ ամեն ինչ կարգին է. «Մենք լավ ենք, դա մենք չենք», – ասաց նա MSK1.RU-ին:

Baza-ն հայտնել է, որ պայթյունի պահին մեքենայում եղել է Տորգաշովի անվանակիցը՝ նույն անուն-ազգանունով։ Նա առնչություն չունի թիվ 33790 զորամասի հետ, բայց նույնպես ծառայում է ՌԴ զինված ուժերում։ Նույն օրը հայտնի դարձավ, որ պայթյունի մեջ կասկածվում է Եվգենի Սերեբրյակովը, որն արդեն հասցրել էր փախուստի դիմել։ ՌԴ Ներքին գործերի նախարարության տվյալներով՝ Վոլգոգրադի մարզից 29-ամյա Սերեբրյակովը հուլիսի 24-ի առավոտյան թռել էր Թուրքիա։

«Ռուսաստանի ՆԳՆ Ինտերպոլի ազգային կենտրոնական բյուրոյի աշխատակիցները կասկածյալի ինքնության, նշանների և գտնվելու վայրի մասին տեղեկատվություն են ուղարկել թուրք գործընկերներին՝ երկու երկրների իրավապահ մարմինների համակարգված աշխատանքի արդյունքում Ինտերպոլի ուղիներով նա նույն օրը ձերբակալվել է Թուրքիայի ՆԳՆ-ի աշխատակիցների կողմից Բոդրում քաղաքում»,- ասվում է գերատեսչության հաղորդագրությունում։