07.10.2026 | 12:28
Իսպանացի մրցավարը որակազրկվել է պատանեկան ԵԱ-ում հայ բռնցքամարտիկների մենամարտերում սխալ որոշումների համար
Թուրքիայում ընկերությունն աշխատանքից հեռացրել է 70 աշխատակցի՝ երկրաշարժի գոտում ապօրինի շինարարությանը դեմ արտահայտվելու համար
Քաղաքականություն
25.07.2024 | 23:02
Թուրքական ընկերությունը, որը երկրաշարժից տուժած Հաթայի Սամանդաղի շրջանում տներ է կառուցում պետական բնակարանային զարգացման վարչության (TOKİ) համար, աշխատանքից ազատել է 70 աշխատակցի՝ առանց նրանց աշխատավարձ վճարելու՝ «աշխատանքները ժամանակին չավարտելու համար»։
Թուրքական լրատվամիջոցները հաղորդում են, որ աշխատակիցները հայտարարել են՝ ընկերությունը փորձում է շարունակել շինարարությունը ապօրինի գործողություններով և անորակ նյութով։ Աշխատողներից երկուսը ինքնասպանության փորձ են կատարել՝ ի նշան բողոքի, բարձրանալով շինհրապարակում գտնվող կռունկի վրա։
Սամանդաղի շրջանի նահանգապետը և ոստիկանությունը, որոնք ժամանել էին շինհրապարակ՝ ընկերության և աշխատողների միջև «ոսկե միջին» գտնելու համար, չեն կարողացել համոզել ընկերությանը վճարել աշխատավարձերը։
Աշխատողների փաստաբան Ջումա Իրմակը ասել է, որ շինարարությունը ժամանակին չավարտելու պատճառը «նյութերի պակասն է»:
«Բանվորներն ասում են, որ նախագծում եղել է 40 պարկուճ (ամրապնդող պողպատ, որը փաթաթվում է սյուների շուրջ), սակայն ընկերությունը կրճատել է դրանց թիվը մինչև 20»,-ասել է փաստաբանը։
Նա նշել է, որ բանվորները ցանկացել են շենքերը կառուցել նախագծին համապատասխան, սակայն նյութերի անբավարարության պատճառով շինարարությունը չի ավարտվել։
Տեղական լրատվամիջոցները նաև լուսանկարներ են տարածել շինհրապարակից, որոնք հաստատում են թերությունների առկայությունը:
«Ես այս ոլորտում մասնագետ չեմ, բայց շենքերը զննել եմ, պարզ է, որ կցամասերի, ամրագոտիների հետ կապված խնդիրներ կան, բանվորներն էլ են առարկում սրան»,-ասել է փաստաբան Իրմակը։
Նա հայտնել է, որ դիմել են ճարտարապետների և ինժեներներից կազմված անկախ թիմին, որպեսզի գան և ստուգեն շենքերը։ «Փետրվարի 6-ի աղետը վերապրեցինք, և հիմա մեզ ուզում են հետ վերադարձնել գերեզմաններ»,- ասել է փաստաբանը։
Սամանդաղը լրջորեն տուժել էր 2023 թվականի փետրվարի 6-ի երկրաշարժերի հետևանքով, և շատ փրկվածներ մնացել են առանց տների։
Էմմա Չոբանյան
