Ակտիվիստները միջատներ են բաց թողել հյուրանոցում, որտեղ հանգրվանել է Նեթանյահուն

Պաղեստինամետ PYM շարժումը տեսանյութ է հրապարակել, որում երևում է, որ որդերն ու ծղրիդները սփռված են Վաշինգտոնի Ուոթերգեյթ հյուրանոցի շուրջը, որտեղ հանգրվանել է Իսրայելի վարչապետ Բենիամին Նեթանյահուն։ Միջատները սողում են հյուրանոցի միջանցքներով և հանդիպման սենյակի սեղանի վրա՝ ԱՄՆ-ի և Իսրայելի դրոշների ֆոնին:

«Բարի ախորժակ։ Անցած գիշեր պաղեստինցի ցուցարարները քաոս էին առաջացրել Ուոթերգեյթ հյուրանոցում՝ Նեթանյահուին, իսրայելական Մոսադի գործակալներին և Գաղտնի ծառայությանը հանգիստն չտալով, քանի որ նրանք շարունակում են ահաբեկել մեր ժողովրդին»,- գրել են շարժման ներկայացուցիչները X սոցիալական ցանցում:

Ինչպես հայտնում է The Washington Post-ը (WP), Ուոթերգեյթում հրդեհի ազդանշան է միացվել ցուցարարների գործողությունների պատճառով։

Պարբերականը նշում է, որ հյուրանոցում անվտանգության միջոցառումներն ուժեղացվել են Բենիամին Նեթանյահուի այցից առաջ։

PYM շարժման ներկայացուցիչ Զեյդ Խատիբը WP-ին ասել է, որ ակտիվիստները ստացել են տեսանյութը անանուն անձից: Նա հավելել է, որ շարժումը նախապես չի իմացել ակցիայի մասին։ Միևնույն ժամանակ, ինչպես ասել է Խատիբը, PYM-ը ցույցեր է կազմակերպում հյուրանոցի շենքի դիմաց, որպեսզի Բենիամին Նեթանյահուն «չկարողանա հանգստանալ, քանի դեռ այստեղ է»։

Հուլիսի 24-ին Նեթանյահուն ժամանել է Վաշինգտոն, որտեղ ելույթ է ունեցել ԱՄՆ Կոնգրեսում։ Իր ելույթում նա չի անդրադարձել Գազայի հատվածում հրադադարի խնդրին, սակայն նշել է, որ պատանդների ազատ արձակման շուրջ բանակցությունները պարբերաբար տեղի են ունենում։ Իսրայելի վարչապետի ելույթն ուղեկցվել է Կապիտոլիումի շենքի դիմաց ցույցերով։ Ցուցարարները պահանջում էին ձերբակալել Բենիամին Նեթանյահուին և դադարեցնել Իսրայելին ԱՄՆ օգնությունը։