Ծեծկռտուք՝ Թուրքիայի խորհրդարանում․ Էրդողանի կուսակիցները հարձակվել է ընդդիմադիր պատգամավորի վրա․ՏԵՍԱՆՅՈՒԹ

Թուրքիայի խորհրդարանում նախօրեին Հարկային օրենսգրքում փոփոխությունների վերաբերյալ քննարկումների ժամանակ իշխող «Արդարություն և զարգացում» կուսակցության պատգամավորները հարձակվել են քրդամետ «Ժողովուրդների հավասարություն և ժողովրդավարություն» կուսակցության պատգամավոր Ալի Բոզանի վրա, հայտնում են թուրքական լրատվամիջոցները։

Տրանսպորտի նախկին նախարար, այժմ իշխող ուժի պատգամավոր Ադիլ Քարաիսմայիլօղլուն պատգամավոր Բոզանին բռունցքով հարվածել է՝ «գող», «անբարոյական», և «ահաբեկիչ» անվանելով։ Բոզանը մինչ այդ ելույթ էր ունեցել՝ կոշտ քննադատելով իշխող կուսակցության հարկային քաղաքականությունը։

«ԱԶԿ-ն Թուրքիայի վիճակագրական ինստիտուտի (TÜIK) միջոցով ամեն ամիս պարբերաբար գողություն է անում աշխատողների, պետական ​​ծառայողների և թոշակառուների գրպաններից։ Սակայն աշխատողների ձայնը, ում աշխատավարձը գողանում են, ցավոք, չի լսվում։ Ես ուզում եմ գոռալ այն քաղաքացիների անունից, ում աշխատավարձը գողանում են՝ գո՛ղ, գո՛ղ, գո՛ղ։ ԱԶԿ-ն գողանո՛ւմ է, ԱԶԿ-ն գողանո՛ւմ է, ԱԶԿ-ն գողանո՛ւմ է»,- հայտարարել էր նա։

ԱԶԿ-ի շարքերից արձագանքել են՝ «Անհարգալից մի՛ եղիր», «Անբարոյական մի՛ եղիր», «Գնա բերանդ լվա՛»։

Բոզանը պատասխանել է․ «Դուք չե՛ք կարողանում արտահայտել ձեր մտքերը, և քանի որ չեք կարողանում արտահայտել ձեր մտքերը, դուք միայն վիրավորանքների եք դիմում: Ձեր բերաններից կեղտի հոտ է գալիս»։ ԱԶԿ-ի պատգամավորները բղավել են՝ «Իջի՛ր այնտեղից, անպատկա՛ռ մարդ»։ Երբ Բոզանը հակադարձել է՝ «Դո՛ւք եք անհարգալիցն ու անբարոյականը», ԱԶԿ պատգամավորները քայլել են դեպի ամբիոն և փորձել են Բոզանին ամբիոնից իջեցնել։ Հալիլ Էրդեմիրը և Քարաիսմաիլօղլուն բռունցքներով հարվածել են Բոզանին։  Նա ընկել է գետնին,  բայց իշխող ուժի պատգամավորները չեն դադարեցրել հարվածները։

Ծեծկռտուքին միջամտել է խորհրդարանի ոստիկանությունը։ Համացանցում տարածվում են նաև ծեծկռտուքի կադրերը։

Էմմա Չոբանյան