30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
ԵՄ-ին արագացված անդամակցելն անհնար է․ բարդ և ծանր գործընթացների միջով պիտի անցնենք, ստանդարտներ ներդնենք․ Մանե Ադամյան․ ՏԵՍԱՆՅՈՒԹ
Քաղաքականություն
24.07.2024 | 20:30
ՀՀ-ում պոպուլյար օրակարգ է դարձել ԵՄ-ին անդամակցելու հարցը․ «Ժողովրդավարական ուժերի հարթակ»-ն առաջարկում է հանրաքվե անցկացնել՝ հռչակելով ՀՀ քաղաքացիների կամքը այդ ուղղությամբ շարժվելու։ Իշխանությունն ասում է՝ չգիտենք, թե ԵՄ-ին ինչքանով է պատրաստ ընդունել ՀՀ-ին։ ԵՄ Խորհրդի որոշումից հետո Եվրաանձնաժողովը երկխոսություն է սկսում Հայաստանի հետ վիզային ռեժիմի ազատականացման շուրջ։ Նշվում է, որ երկխոսությունը կհանգեցնի բարեփոխումների կարևոր ոլորտներում, ներառյալ ճամփորդական փաստաթղթերի անվտանգությունը, սահմանային վերահսկողությունը, միգրացիան և ապաստանը, հասարակական կարգը, արտաքին հարաբերությունները և հիմնարար իրավունքների հարցերը Հայաստանում: Ի՞նչ ճանապարհ է սկսում ՀՀ-ն, արդյո՞ք հեշտ և արագ հաղթահարելի են այս պրոցեսները։
ԵՄ-ի հետ ռազմավարական համագործակցության հարցերով փորձագետ Մանե Ադամյանը Factor TV-ի հետ զրույցում ասում է, թե բացառված է, որ ԵՄ-ն հեշտացնի ՀՀ-ի անդամակցությունը զուտ միայն՝ հանրաքվեի շնորհիվ, եթե նույնիսկ՝ մարդկանց ճնշող մեծամասնությունը կողմ լինի հայտ ներկայացնելուն․
«Ինչո՞ւ ՀՀ իշխանությունը ԵՄ-ին անդամակցելու կամքը չի կարող բարձաձայնել, հանրաքվեն ինչո՞ւ է անհրաժեշտ։ Եվ նաև՝ ԵՏՄ-ին անդամակցության դադարեցման հարց պիտի քննարկենք, եթե ԵՄ-ին անդամակցելու լուրջ նպատակ կա։ ԵՏՄ-ին անդամակցության դադարեցումը չի նշանակում՝ ՌԴ-ի հետ առևտուրը տեղի չի ունենալու․ ռիսկերը պիտի կառավարվեն։ Եթե ՀՀ-ի ապագայի համար կտրուկ որոշում ենք կայացնում, բոլորս այդ աշխատանքին պիտի լծվենք, դա չենք անում, միայն բարի ցանկությունների վրա հիմնվելով կտրուկ փոփոխություններ չպետք է անել, չհաշվարկված գործողություններ չանենք։ Մինչ ԵՄ-ին անդամակցելը շատ երկար գործընթացներ պիտի արվեն, որոնցով դեռ չենք անցել, Ասոցացման համաձայնագիր չունենք։ ԵՄ-ին արագացված անդամակցել անհնար է․ բարդ և ծանր գործընթացների միջով պիտի անցնենք, ստանդարտներ ներդնենք։ ԱՄՆ-ն և ԵՄ-ն քաղաքական կամք ունեն ՀՀ-ին աջակցելու, բայց երկնքից աստղեր չեն խոստանում»,- նշեց Մանե Ադամյանը։
Հարցազրույցն ամբողջությամբ՝ տեսանյութում։
Ռոբերտ Անանյան
