Քաղաքականություն
24.07.2024 | 18:43
Եվրամիության երկրների մշտական ներկայացուցիչների կոմիտեն հավանություն է տվել Կիևին 4,2 միլիարդ եվրոյի չափով առաջին կանոնավոր վճարմանը «Ուկրաինայի համար» եվրոպական հիմնադրամից ((Ukraine Facility)։ Այս մասին հայտարարել է ԵՄ Խորհրդում Հունգարիայի նախագահությունը, գրում է BBC-ի ռուսական ծառայությունը։
«Այսօր մշտական ներկայացուցիչները հաստատել են առաջին վճարումը «Ուկրաինայի համար» հիմնադրամի միջոցով, ինչը հնարավորություն է տալիս մոտ 4,2 միլիարդ եվրո տրամադրել Ուկրաինայի վերականգնմանն ու վերակառուցմանն աջակցելու համար»,-ասվում է նախագահության X-ի էջում գրառման մեջ։
Այժմ ԵՄ խորհուրդը գրավոր հաստատելու է համապատասխան որոշումը։ Հուլիսի 17-ին Եվրահանձնաժողովը դրական գնահատական էր տվել այս տրանշի վճարման հնարավորությանը՝ կապված այն բանի հետ, որ Կիևը բավարար չափով կատարել է բարեփոխումների 9 ցուցանիշ։
«Ուկրաինայի համար» հիմնադրամի շրջանակներում Կիևը 2024-2027 թվականներին դրամաշնորհների և վարկերի տեսքով կստանա մինչև 50 միլիարդ եվրո:
