ԱՄՆ սենատորները Ադրբեջանի իշխանություններին կոչ են անում անհապաղ ազատ արձակել ընդդիմադիր հայտնի գործիչ Իբադօղլուին

ԱՄՆ 10 սենատորներ՝ 8 դեմոկրատ ու 2 հանրապետական, հանդես են եկել  հայտարարությամբ ադրբեջանցի ընդդիմադիր գործիչ Գուբադ Իբադօղլուի վերաբերյալ, փոխանցում են ադրբեջանական լրատվամիջոցները։

«Այսօր լրանում է մեկ տարին այն օրից, երբ ամերիկյան համալսարանների հետ սերտ կապեր ունեցող աշխարհահռչակ տնտեսագետ և գիտնական Գուբադ Իբադօղլուն անարդարացիորեն բանտարկվեց Ադրբեջանի կառավարության կողմից՝ կեղծ արտարժույթ պատրաստելու և ծայրահեղական նյութեր պահելու մեղադրանքով։ Չնայած մեկ տարի է անցել՝ Ադրբեջանի իշխանությունները դեռևս Իբադօղլուին չեն տրամադրել իրավաբանական խորհրդատվություն, արդար դատավարություն կամ տարրական բժշկական օգնություն: Մենք խորապես մտահոգված ենք դոկտոր Իբադօղլուի ներկայիս իրավիճակով, քանի որ նա բախվել է վատ վերաբերմունքի և անմարդկային պայմանների, ներառյալ համապատասխան բժշկական օգնության բացակայությունը՝ չնայած նրա առողջական վիճակի վատթարացմանը»,-ասվում է հայտարարության մեջ։

Նշվում է, որ ինչպես շատ իրավապաշտպաններ Ադրբեջանում, Իբադօղլուն անխոնջ նվիրվածություն է դրսևորել ժողովրդավարության, լավ կառավարման և մարդու իրավունքների խթանման գործում ինչպես իր հայրենիքում՝ Ադրբեջանում, այնպես էլ Միացյալ Նահանգներում, որտեղ նա ապրել և աշխատել է:

«Մենք խստորեն դատապարտում ենք ադրբեջանական իշխանությունների վերաբերմունքը դոկտոր Իբադօղլուի նկատմամբ և կոչ ենք անում անհապաղ և անվերապահ ազատ արձակել նրան, որպեսզի նա վերամիավորվի իր կնոջ՝ Իրադայի և երեխաների՝ Ջալեի, Իբադի և Էմինի հետ»,-նշում են սենատորները։

Նշենք, որ ապրիլի 22-ին Ադրբեջանի իշխանությունները, տեղի տալով միջազգային ճնշումներին, ընդդադիր գործիչ, հայտնի տնտեսագետ Գուբադ Իբադօղլուի բանտարկությունը փոխարինել էին տնային կալանքով։

Գուբադ Իբադօղլուն կալանավորվել է 2023 թվականի հուլիսի 23-ին՝ կեղծ փողեր պատրաստելու (Քրեական օրենսգրքի 204.3.1 հոդված) և կրոնական ծայրահեղական բնույթի նյութեր տարածելու մեղադրանքով (քրեական օրենսգրքի 167-3.1 հոդված)։ Այս մեղադրանքներով նրան սպառնում է մինչև 17 տարվա ազատազրկում։ 2023 թվականի հուլիսի 24-ին Բաքվի Նարիմանովի շրջանային դատարանն ընդդիմադիր գործչի նկատմամբ խափանման միջոց է ընտրել 3 ամիս 26 օր ժամկետով կալանքը։ Փետրվարի 15-ին նրա կալանքը երկարացվել է ևս երեք ամսով։ Իբադօղլուն չի ընդունում առաջադրված մեղադրանքները՝ նշելով, որ իրեն բանտարկել են քաղաքական պատվերով։

Տեղական և միջազգային իրավապաշտպան կազմակերպությունները  Իբադօղլուին համարում են քաղբանտարկյալ։ Նա, բացի քաղաքական գործունեությունից, հայտնի է նաև որպես տնտեսագետ, դասավանդում է արտասահմանյան մի շարք բուհերում։ Սոցցանցերի էջերում Իբադօղլուն պարբերաբար սուր քննադատության էր ենթարկում Իլհամ Ալիևին՝ տնտեսության վատ կառավարման, երկրում կոռուպցիայի, մարդու իրավունքների վատ վիճակի համար։

Էմմա Չոբանյան