Ադրբեջանում թալիշ հետազոտողի են ձերբակալել ազգային փոքրամասնությունների վերաբերյալ ուսումնասիրությունների համար

Ադրբեջանում ձերբակալվել է թալիշ հետազոտող Իքբալ Աբիլովը, որը հետազոտություններ է անցկացրել երկրի ազգային փոքրամասնությունների վերաբերյալ։ Ադրբեջանական լրատվամիջոցները գրում են, որ Բելառուսից արձակուրդի համար Ադրբեջան ժամանած Ադրբեջանի քաղաքացի, ազգությամբ թալիշ Իգբալ Աբիլովը Պետանվտանգության ծառայության աշխատակիցների կողմից բերման է ենթարկվել Մասալլիի շրջանի Բալա Քոլաթան գյուղում։

Հարազատների խոսքով՝ նա մանկուց ապրել է Բելառուսում և հունիսի 14-ին մեկնել  է Ադրբեջան՝ իր զարմիկի հարսանիքին։ Հունիսի 22-ին Աբիլովը կանչվել  է Պետական ​​անվտանգության ծառայության Մասալլիի շրջանային բաժին և 6 ժամ հարցաքննվել։

Հունիսի 27-ին Բաքվից Մինսկ թռչելիս նրան թույլ չեն տվել ինքնաթիռ նստել, խլել են անձնագիրն ու հեռախոսը։ Հուլիսի 22-ին Աբիլովին կրկին հրավիրել են Պետական ​​անվտանգության ծառայության Մասալլիի շրջանային բաժին՝ անձնագիրը և հեռախոսը վերադարձնելու պատրվակով։ Սակայն առանց ծնողներին ծանուցելու Աբիլովին տարել են Բաքու։

Մարդու իրավունքներին պաշտպանին դիմելուց հետո ծնողներին հայտնել են, որ Աբիլովը կասկածվում է Ադրբեջանի քրեական օրենսգրքի 283-րդ  (ազգային ատելության սերմանում) և 274-րդ (պետական ​​դավաճանություն) հոդվածներով։

Հարազատները պնդում են, որ Աբիլովը ձերբակալվել է շինծու մեղադրանքներով․ իրական պատճառը տարբեր ազգային փոքրամասնությունների, այդ թվում՝ Ադրբեջանի թալիշների մասին հետազոտություններն են։

Նա, լինելով Ադրբեջանի քաղաքացի, ունի նաև Բելառուսում բնակության թույլտվություն։ Աբիլովը Լատվիայում գրանցված «Թալիշի ազգային ակադեմիա»-ի հիմնադիրներից է։ Ակադեմիայի նպատակն է ուսումնասիրել և հետազոտել թալիշերենը սոցիալ-տնտեսական, պատմական, ազգագրական, հնագիտական, գրական և լեզվաբանական տեսանկյունից: Նա նաև «Թալիշի ազգային ակադեմիայի լրատվական»-ի գլխավոր խմբագիրն է։

Էմմա Չոբանյան